Qırmızı və yaşıl üzüm qida dəyərinə görə bir-birinə yaxın olsa da, qırmızı üzüm tərkibində daha çox faydalı antioksidant maddələr daşıyır.
Verywell Health nəşrinin məlumatına görə, hər iki üzüm növü sağlamlıq üçün faydalıdır. Lakin hansı növə üstünlük veriləcəyi həm şəxsi zövqdən, həm də orqanizmin hansı faydalı maddələrə daha çox ehtiyac duymasından asılıdır.
Qırmızı üzüm antioksidant baxımından üstündür
Mütəxəssislərin sözlərinə görə, qırmızı üzümdə kversetin və mirisetin kimi flavonoidlərin miqdarı yaşıl üzümdən daha çoxdur. Bundan başqa, resveratrol və antosianların səviyyəsi də qırmızı üzümdə xeyli yüksəkdir.
Resveratrol ürək və beyin üçün faydalıdır
Resveratrol bütün üzüm növlərində mövcuddur. Ancaq qırmızı və bənövşəyi üzümdə bu maddənin miqdarı yaşıl üzümdən əhəmiyyətli dərəcədə çoxdur.
Mütəxəssislər bildirirlər ki, resveratrol güclü antioksidant olmaqla yanaşı, iltihab əleyhinə təsir göstərir, ürək-damar sistemini qoruyur və beyin hüceyrələrinin fəaliyyətini dəstəkləyir.
Niyə qırmızı şərabda resveratrol daha çoxdur?
Alimlər bunu istehsal texnologiyası ilə izah edirlər. Ağ şərab hazırlanarkən üzümün qabığı adətən əvvəlcədən ayrılır. Qırmızı şərab isə qabıqla birlikdə mayalandırıldığı üçün resveratrolun miqdarı daha yüksək olur.
Çünki bu faydalı maddə əsasən üzümün qabığında toplanır.
Antosianlar qırmızı üzümün əsas üstünlüyüdür
Yaşıl üzümdə flavonollar üstünlük təşkil etdiyi halda, qırmızı üzümdə əsas polifenollar antosianlardır.
Bu təbii piqmentlər üzümün qırmızı rəngini formalaşdırmaqla yanaşı, güclü antioksidant xüsusiyyətlərə malikdir. Araşdırmalara görə, antosianlar:
antioksidant təsir göstərir;
şəkərli diabet riskinin azalmasına kömək edə bilər;
bəzi şiş növlərinə qarşı qoruyucu təsir göstərə bilər;
iltihabəleyhinə xüsusiyyətə malikdir;
antimikrob təsir göstərir.
Bundan əlavə, üzüm qabığından əldə edilən antosianlar qida sənayesində mürəbbə, içkilər və digər bənövşəyi rəngli məhsulların hazırlanmasında təbii qida boyası kimi də istifadə olunur.
Mütəxəssislər bildirirlər ki, hər iki üzüm növü sağlam qidalanmanın bir hissəsi ola bilər. Lakin antioksidantların miqdarına görə qırmızı üzüm yaşıl üzümdən daha üstün hesab edilir.
