Finlandiya prezidenti Aleksander Stubb Qrenlandiya ətrafında yaranmış gərginliklə bağlı ən təhlükəli ssenarinin önləndiyini bəyan edib. Bununla belə, o vurğulayıb ki, vəziyyətin tam həll olunduğunu söyləmək hələ tezdir.
AzPost xəbər verir ki, The Wall Street Journal qəzetinə müsahibəsində Finlandiya lideri ada ətrafındakı mümkün prosesləri üç ssenari üzrə dəyərləndirib: “yaxşı”, “pis” və “dəhşətli”. Onun sözlərinə görə, “yaxşı” ssenari Arktika bölgəsində təhlükəsizliyin gücləndirilməsi istiqamətində addımların atılmasını nəzərdə tutur. “Pis” ssenari Avropa ilə ABŞ arasında tarif qarşıdurmasının daha da kəskinləşməsi ilə xarakterizə olunur. “Dəhşətli” ssenari isə ərazinin güc yolu ilə ələ keçirilməsi ehtimalını əhatə edir.
Aleksander Stubb bildirib ki, hazırda Qrenlandiya ətrafında əsas gərginlik, onun qiymətləndirməsinə görə, aradan qalxıb. Lakin o açıq şəkildə qeyd edib ki, vəziyyət hələ də qeyri-müəyyən olaraq qalır və müsbət ilə mənfi ssenarilər arasında incə bir tarazlıqda dayanır.
Finlandiya prezidentinin fikrincə, Arktika regionunda baş verən proseslər təkcə regional deyil, qlobal təhlükəsizlik baxımından da diqqətlə izlənməlidir və yaxın dövrdə bu mövzu beynəlxalq gündəmdə qalmaqda davam edəcək.
