“Azərbaycanın Kiyevdəki səfirliyinin yaxınlığının Rusiyanın atdığı “İsgəndər” raketinin düşməsi və nəticədə səfirliyin binasının dağıntılara məruz qalması haqlı olaraq müəyyən şübhələrə səbəb olur“.
AzPost bildirir ki, bu sözləri Milli Məclisin sabiq deputatı, hüquqşünas Qulamhüseyn Əlibəyli baş verən hadisəni şərh edərkən deyib.
Onun sözlərinə görə, son dövrlər adətən hərbi deyil, daha çox mülki obyektlər Rusiya tərəfinin raket zərbələrinə məruz qalır. Rusiya hər dəfə mülki obyektlər deyil, guya hərbi obyektlərə raket zərbəsi endirdiyini israrla bildirsə də, bu, inandırıcı görünmür və faktiki vəziyyətə uyğun gəlmir: “Kiyevdə və Ukraynanın digər şəhərlərində hərbi obyektlərin dəqiq dislokasiyasının Rusiyanın əlində olması şəksizdir. Azərbaycanın Ukraynadakı səfirliyinin binası hərbi obyekt deyil və səfirliyin yaxınlığında heç bir hərbi obyekt yerləşmir. Bu da səfirliyin ətrafının qəsdən nişan alınması təəssüratını yaradır”.
Q.Əlibəylinin fikrincə, bu təəssüratı güçləndirən bir neçə amil də mövcuddur: “Belə ki, Azərbaycan səfirliyi artıq 2-ci dəfədir ki, Rusiyanın raket hücumlarından zərər çəkir. Bir müddət bundan əvvəl də Azərbaycanın Kiyevdəki səfirliyinin yaxınlığına raket düşmüşdü və səfirliyimizin binası zərər çəkmişdi. Müharibənin gedişində bu günə qədər Azərbaycandan başqa, heç bir dövlətin səfirliyi Rusiyanın raket hücumlarından zərər çəkməyib. Bundan başqa, bu yaxınlarda Rusiya Odessada Azərbaycan qazını nəql edən qaz kompressor stansiyasına və SOCAR-ın neft bazasına zərbələr endirmişdi”.
Ekspertin sözlərin görə, ilk baxımdan təsadüfi görünən hadisələrin təkrarlanması Azərbaycana aidiyyəti olan qaz kompressor stansiyasına və neft bazasına zərbələr endirilməsi həmin hərəkətlərin qəsdən törədilməsi ehtimalını daha da artırır: “Azərbaycan Rusiyaya qarşı sanksiyalara qoşulmasa da, Ukraynanın ərazi bütövlüyünü tanıyır və Ukraynaya humanitar yardım edir. Görünür bu, Rusiya hakimiyyətinin xoşuna gəlmir və ölkəmizi bu mövqedən cəkindirmək məqsədilə bu cür təzyiq vasitələrindən istifadə edir. Avropanın enerji təhlükəsizliyinin təmin olunmasında Azərbaycanın mövqeyini zəiflətmək də bu hücumların məqsədlərindən biri kimi nəzərdən keçirilə bilər. Çünki Rusiyanın özünün enerji sektoru ciddi böhran keçirir və faktiki çökmə ərəfəsindədir”.
Q.Əlibəyli vurğulayıb ki, mülki infrastrukturları və diplomatik nümayəndəlikləri hədəf kimi seçməklə Rusiya insanlıq əleyhinə və hərbi xarakterli beynəlxalq cinayətlərini davam etdirir və Ukraynada düşdüyü bataqlığı daha da dərinləşdirir.
