Fransa hərbçiləri tərəfindən saxlanılan Rusiyanın “kölgə donanması”na aid olmaqda şübhəli bilinən “Boracay” tankeri yenidən səfərə başlayıb. Marine Traffic and Vesselfinder-in məlumatına görə, gəmi Fransanın qərb sahilindən Süveyş kanalına doğru hərəkət edir.
AzPost-un məlumatına görə, məsələ ilə bağlı məlumatlı mənbə France 24-ə bildirib ki, gəminin kapitanı olduğunu iddia edən Çin vətəndaşı gəmiyə qayıdıb. Daha əvvəl bildirilmişdi ki, o, yerli hakimiyyət orqanları ilə əməkdaşlıqdan imtina etdiyinə görə Fransada mühakimə olunacaq.
KİV-in məlumatına görə, Benin bayraqlı Boracay gəmisi sentyabrın 20-də Leninqrad vilayətindəki Primorsk limanından Hindistana yola düşüb. Sentyabrın 22-dən 25-dək gəmi Danimarka sahillərində olub, bundan sonra naməlum pilotsuz təyyarələrin oradakı hava limanları və hərbi obyektlər üzərində uçması müşahidə edilib.
Boracay sentyabrın 27-də saxlanılıb.
Oktyabrın 1-də Fransa hərbçiləri Fransanın qərbindəki Sen-Nazer limanı yaxınlığında lövbər salmış tankerə miniblər. Onlar onun pilotsuz uçan aparat platforması kimi xidmət etdiyini göstərən əlamətlər axtarırdılar. Fransa prezidenti Emmanuel Makron bu ehtimalı “istinka etmədiyini” bildirib. Rusiya prezidenti Vladimir Putin bunu təkzib edib və “qarşıdurma riski ilə” hədələyib.
Bu ilin əvvəlində bu neft tankeri Estoniyada saxlanılmışdı – o vaxt gəmi Kiwala adlanırdı. Estoniya Hərbi Dəniz Qüvvələri etibarlı Estoniya bayrağı olmadan üzmə də daxil olmaqla 40-dan çox pozuntu aşkar edib. Tankerin ekipajı bu pozuntuları aradan qaldırdıqdan sonra tanker buraxılıb. Aİ və Böyük Britaniya gəmiyə sanksiya tətbiq etdi, Brüssel isə gəminin Rusiya neftinin və neft məhsullarının daşınmasında birbaşa iştirak etdiyini və “qeyri-müntəzəm və riskli naviqasiya üsullarından” istifadə etdiyini iddia edib.
