Rusiya prezidentinin mətbuat katibi Dmitri Peskov ölkəsinin nümayəndə heyətinin noyabrın 10-11-də Əbu-Dabidə keçiriləcək üçtərəfli danışıqlarda iştirak edəcəyini təsdiqləyib. Rusiya tərəfinin nümayəndə heyətinə yenə də dövlət başçısının köməkçisi Vladimir Medinski rəhbərlik edəcək.
Peskov bu barədə noyabrın 3-də jurnalistlərə açıqlamasında bildirib.
“Bu prosesdə Rusiya tərəfinin əsas danışıq aparan nümayəndəsinə gəlincə, prezidentin bəyanatını xatırladım: bu vəzifədə həmkarım Medinski qalır”, – deyə Peskov qeyd edib.
Kremlin sözçüsü Rusiya nümayəndə heyətinin Birləşmiş Ərəb Əmirliklərinin paytaxtına səfərinin tarixini də təsdiqləyib. “Bəli, bu tarixi təsdiq edə bilərəm. Rusiya nümayəndə heyəti noyabrın 10-11-də Əbu-Dabidə olacaq və danışıqlarda iştirak edəcək”, – Peskov bildirib.
Bununla yanaşı, o, Rusiya nümayəndə heyətinin tam tərkibini açıqlamayıb. Peskov həmçinin Rusiya prezidenti Vladimir Putinin danışıqlarda iştirak edəcək Rusiya nümayəndələri ilə ayrıca təmaslarının hələlik planlaşdırılmadığını deyib.
Xatırladaq ki, bundan əvvəl ABŞ prezidentinin xüsusi nümayəndəsi Stiv Uitkoff Moskva və Kiyev nümayəndələrinin Birləşmiş Ərəb Əmirliklərində görüşünün noyabrın 10-11-də ABŞ-ın vasitəçiliyi ilə keçiriləcəyini açıqlamışdı.
Onun sözlərinə görə, müzakirələr müharibədən sonrakı təhlükəsizlik mexanizmləri, gərginliyin azaldılması, humanitar yardım və sülhə doğru növbəti addımlara həsr olunacaq.
