Rusiya prezidenti Vladimir Putinlə finlandiyalı həmkarı Sauli Niinistö arasında telefon söhbəti olub.
Azpost.info xəbər verir ki, söhbətin təfərrüatları barədə Kreml və Finlandiya prezidentinin ofisi məlumat yayıb. Məlumata görə, Sauli Niinistö telefon danışığı zamanı Vladimir Putinə ölkəsinin NATO-ya üzv olmaq niyyətindən danışıb.
O, Finlandiyanın yaxın günlərdə alyansa üzvlüklə bağlı qərar verəcəyini açıqlayıb. Öz növbəsində, Putin bildirib ki, Finlandiyanın hərbi neytrallıq siyasətindən imtina etməsi səhv olardı. Çünki ölkənin təhlükəsizliyinə heç bir təhdid yoxdur.
O qeyd edib ki, Finlandiyanın xarici siyasətində dəyişiklik Rusiya ilə uzun illərdir mehriban qonşuluq və tərəfdaşlıq əməkdaşlığı ruhunda qurulmuş münasibətlərə mənfi təsir göstərə bilər. Finlandiya prezidenti əlavə edib ki, ölkəsi NATO-ya daxil olmaqla öz təhlükəsizliyini gücləndirir və məsuliyyəti öz üzərinə götürür.
Niinistö hesab edir ki, Rusiyanın 2021-ci ilin sonunda ölkələrin NATO-ya üzv olmasının qarşısını almaq məqsədi daşıyan tələbləri və Rusiyanın Ukraynada xüsusi əməliyyata başlaması Finlandiyanın təhlükəsizlik vəziyyətini əsaslı şəkildə dəyişib. Qeyd edək ki, prezidentlər arasında telefon danışığı Finlandiya tərəfinin təşəbbüsü ilə baş tutub.
Azpost.info
