Rusiya Federal Mühafizə Xidmətinin əməkdaşları Moskvada prezident administrasiyasının binasına oyuncaq avtomatla girməyə cəhd edən pensiyaçını saxlayıblar.
Azpost.info xəbər verir ki, bu barədə “Baza” məlumat yayıb.
Mühafizəçilər binaya daxil olmaq istəyən şəxsin qarşısını kəsiblər və polis çağırıblar.
Hadisə yerinə gələn hüquq-mühafizə orqanlarının əməkdaşları kimliyi məlum olmayan şəxsi saxlayaraq şöbəyə aparıblar. Orada məlum olub ki, saxlanılan şəxsin adı Viktordur, onun 69 yaşı var və təqaüdə çıxıb.
Kişi öz hərəkətini onunla izah edib ki, 15 ildir ki, prezidentlə görüşmək istəsə də, həmişə rədd cavabı alıb. Ona görə də bu dəfə dövlət başçısının qəbuluna düşmək üçün daha qətiyyətli hərəkət etmək qərarına gəlib.
İfadəsi alındıqdan sonra pensiyaçı polis şöbəsindən psixiatriya xəstəxanasına aparılıb.
Azpost.info
