Rusiyanın mühakiməsi üçün beynəlxalq tribunal yaradılır –AŞPA qətnamə qəbul etdi

Avropa Şurası Parlament Assambleyası (AŞPA) Rusiyanın Ukraynadakı cinayətlərinə baxacaq beynəlxalq tribunalın yaradılması təşəbbüsü ilə çıxış edib.

Azpost.info xəbər verir ki, bu barədə AŞPA-nın mətbuat xidməti məlumat yayıb.

Assambleya AŞPA-da sosialist qrupunun rəhbəri, alman deputat Frank Şvabenin hesabatı əsasında qətnamə qəbul edib. AŞPA Rusiya silahlı qüvvələrinin törətdiyi vəhşiliklərə dair artan sübutlardan narahat olduğunu bəyan edib. Qurum Rusiyanın beynəlxalq insan haqlarını və beynəlxalq humanitar hüququ pozan hərəkətlərini, eləcə də digər beynəlxalq cinayətlərini (müharibə cinayətləri, insanlığa qarşı cinayətlər və soyqırımı) araşdırmağa yönəlmiş bütün səyləri tam dəstəklədiyini bildirib.

Ukrayna Ali Radasının Assambleyadakı nümayəndə heyətinin rəhbəri Mariya Mezentsevanın sözlərinə görə, AŞPA bu sənədlə Avropa Şurası üzvlərini Rusiyanın siyasi və hərbi rəhbərliyinin törətdiyi təcavüz cinayətini araşdırmaq və mühakimə etmək üçün xüsusi beynəlxalq cinayət tribunalı yaratmağa çağırır.

Qətnamədə həmçinin Avropa Şurası Nazirlər Komitəsinin Rusiyanın Ukraynaya təcavüzünün nəticələri ilə bağlı xüsusi nümayəndənin təyin edilməsi ilə bağlı tövsiyəsi yer alıb. Parlamentarilər həmçinin qeyd ediblər ki, Rusiyanın təcavüzü İkinci Dünya müharibəsindən sonra qlobal idarəçiliyə meydan oxuyub, Avropada ən ağır humanitar böhrana, enerji qiymətlərinin kəskin artmasına və ərzaq təhlükəsizliyinə səbəb olub. Qətnamə hərbi əməliyyatları dayandırmaq, qoşunları Ukraynanın suveren ərazisindən çıxarmaq və beynəlxalq hüquqa riayət etmək üçün Rusiyaya təzyiqlərin davam etdirilməsini tələb edir.

Qətnamə demək olar ki, yekdilliklə dəstəklənib. 147 nəfərdən 144-ü sənədin lehinə səs verib.

Azpost.info

Əvvəlki məqalə

Ukraynada müharibənin bitməsi Moskvanın qərarından asılıdır –

Sonrakı məqalə

ABŞ Rusiyanın müsadirə olunmuş pullarını Ukraynaya verəcək –