2023-cü ilin iki ayı ərzində Rusiya büdcəsində neft-qaz gəlirləri bir il əvvəlki 1,766 trilyon rubla qarşı 946,7 milyard rubl təşkil edib.
Azpost.info xəbər verir ki, bu, Qərbin sanksiyaları və Rusiya neftinə tətbiq edilən qiymət məhdudiyyətləri fonunda baş verib.
Rusiya Maliyyə Nazirliyi mart ayında büdcəyə nəzərdə tutulduğundan 132,1 milyard rubl az neft və qaz gəlirlərinin daxil olacağını hesablayıb.
Beynəlxalq Enerji Agentliyi Rusiyanın neft və qaz satışından əldə etdiyi gəlirlərin təxminən 40 faiz azaldığını bildirib. Təşkilat bu prosesin yaxın aylarda daha kəskin olacağını proqnozlaşdırır.
Hazırda Avropada qaz ehtiyatları ilin tarixi maksimuma çatıb. Yeraltı qaz anbarları 60,62 faiz doludur. Bu, son beş ilin orta göstəricidən 21,46 faiz yüksəkdir. Anbarlarda 65,82 milyard kubmetr qaz olduğu bildirilir.
O da məlum olub ki, 2022-ci ildə Avropada qaz istehlakı 13 faiz və ya 70 milyard kubmetrdən çox azalıb. Bu, Avropanın tarixində ən böyük azalmadır.
Azpost.info
