Səhv məhsulu müştəri niyə geri aparmalıdır?

Birmarket (əvvəlki Umico) platformasından alış edən vətəndaş sifariş etdiyi məhsulun əvəzinə daha ucuz alternativin göndərildiyini bildirərək şirkətin geri qaytarma qaydalarından narazılıq edib.

AzPost xəbər verir ki, müraciətə əsasən, sifariş edilən məhsulun stokda olmadığı barədə əvvəlcədən məlumat verilmədən, müştəriyə təxminən 50 faiz daha ucuz başqa məhsul çatdırılıb. Vətəndaş bu səbəbdən geri qaytarma tələbi irəli sürüb.

Şikayətdə qeyd olunur ki, şirkət əməkdaşı məhsulun müştəri tərəfindən ən yaxın Birmarket şöbəsinə aparılaraq təhvil verilməsini tələb edib. Bu isə vətəndaşın əlavə vaxt və yol xərci çəkməsi ilə nəticələnib.

Narazılıq doğuran digər məqam isə çatdırılma xidmətinə görə ödəniş alınmasına baxmayaraq, geri qaytarma zamanı “belə xidmətin mövcud olmaması” cavabının verilməsidir. Bundan əlavə, müştəriyə məhsulu 3 gün ərzində şöbəyə təhvil vermək tələbi qoyulduğu bildirilir.

İstehlakçı hüquqları nə deyir?

Azərbaycan Respublikasının “İstehlakçıların hüquqlarının müdafiəsi haqqında” Qanununa əsasən, istehlakçıya sifariş etdiyi məhsuldan fərqli və ya qüsurlu məhsul təqdim edildikdə, o, məhsulu geri qaytarmaq və ya sifarişə uyğun məhsulla əvəz olunmasını tələb etmək hüququna malikdir.

Qanunvericiliyə görə:

• Satıcının səhvi nəticəsində göndərilən məhsulun geri qaytarılması istehlakçı üçün əlavə xərc yaratmamalıdır;

• Qablaşdırması açılmayan məhsullar üçün geri qaytarma müddəti 15 günədək nəzərdə tutulur;

• Satıcı geri qaytarma prosesində istehlakçıya əlavə öhdəliklər yükləməməlidir.

Bu halda vətəndaş hara müraciət etməlidir?

Mütəxəssislərin tövsiyəsinə görə, bu kimi hallarda vətəndaş aşağıdakı addımları ata bilər:

1. Satıcıya rəsmi yazılı müraciət
   Geri qaytarma tələbi tətbiq və ya elektron poçt vasitəsilə yazılı şəkildə təqdim edilməli, cavab saxlanılmalıdır.

2. İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti
   Vətəndaş istehlakçı hüquqlarının pozulması ilə bağlı bu quruma rəsmi şikayət edə bilər.

3. Elektron şikayət platformaları
   Şikayətlər e-gov.az üzərindən və ya İqtisadiyyat Nazirliyinin rəsmi onlayn müraciət sistemləri vasitəsilə təqdim edilə bilər.

4. Məhkəməyə müraciət
   Satıcı ilə mübahisə həll olunmadıqda, istehlakçı məhkəmə qaydasında maddi ziyanın və hüquqlarının bərpasını tələb edə bilər.

Qeyd olunur ki, sifariş, ödəniş qəbzi, yazışmalar və məhsulun fotoşəkilləri sübut kimi saxlanılmalıdır.

Məsələ ilə bağlı Birmarket-in rəsmi mövqeyi açıqlanmayıb.

AzPost.az