Boliviyanın keçmiş prezidenti Evo Moralesə qarşı insan alveri ilə bağlı cinayət işi açılıb. AzPost xəbər verir ki, bu barədə RTP Bolivia telekanalına istinadən Tarixa departamentinin vəzifəsindən azad edilmiş keçmiş prokuroru Sandra Qutyerres məlumat verib.
Qutyerresin sözlərinə görə, Moralesə qarşı “ağırlaşdırıcı hallarla insan alveri cinayəti” maddəsi üzrə rəsmi ittihamlar artıq təqdim olunub. “Biz sənədləri ötən axşam təqdim etdik. Huan Evo Moralesə qarşı insan alveri ilə bağlı rəsmi ittihamlar irəli sürülüb,” – deyə o bildirib.
Boliviyanın Baş prokuroru Rodjer Mariaka Monteneqro isə qeyd edib ki, Sandra Qutyerresin vəzifədən getməsi bu işlə əlaqədar deyil. O, həmçinin əlavə edib ki, Moraleslə yanaşı daha bir qadın da eyni iş üzrə təqsirləndirilən şəxs qismində tanınıb.
İstintaq detallarının açıqlanmadığı bildirilir, lakin məlumdur ki, iş üzrə zərərçəkən kimi azyaşlı uşağı olan bir qız çıxış edir.
