Alman alimləri Saturnun peyki Enseladda mövcud olan şəraitdə yaşaya biləcək bir orqanizm müəyyən ediblər.
Münhen Lüdviq-Maksimilian Universiteti, Regensburq Universiteti və Berlin Azad Universitetinin tədqiqatçılarından ibarət elmi qrup laboratoriyada Saturnun peyklərindən biri olan Enseladın buz təbəqəsinin altında yerləşən okeanın şəraitini modelləşdirib.
Təcrübə zamanı məlum olub ki, arxeya adlanan qədim birhüceyrəli orqanizm belə şəraitdə yaşaya və inkişaf edə bilir.
Münhen Lüdviq-Maksimilian Universitetinin açıqlamasında bildirilib ki, nəticələr alimlər üçün gözlənilməz olub. Orqanizm Enseladın laboratoriyada yaradılmış şəraitində böyüməyə davam edib və su ilə süxurlar arasında gedən reaksiyalar nəticəsində yaranan hidrogendən istifadə edərək metan istehsal edib.
Enseladda həyat ola bilərmi?
Tədqiqatın müəllifləri xüsusi olaraq vurğulayırlar ki, əldə olunan nəticələr Enseladda həyatın mütləq mövcud olduğunu göstərmir.
Lakin araşdırma Saturnun bu peykindəki şəraitin Yerdəki həyatın ən qədim formalarından biri hesab edilən arxeyaların yaşaması üçün uyğun ola biləcəyini göstərir.
Enseladın səthi buzla örtülüb və onun altında maye okeanın olduğu düşünülür. Bu səbəbdən peyk uzun müddətdir alimlərin Günəş sistemində həyat axtarışında diqqət mərkəzində olan göy cisimlərindən biridir.
Yeni araşdırma Enseladda həyatın mövcudluğuna dair sübut deyil, lakin oradakı mühitin ən azı bəzi Yer orqanizmləri üçün nəzəri baxımdan yaşamağa əlverişli ola biləcəyini göstərən mühüm nəticədir.
