Şimali Koreyadan olan hakerlər son bir neçə ildə kiberhücumlardan 3 milyard dollar əldə ediblər.
Azpost.info xəbər verir ki, “Reuters” bu barədə BMT-nin dərc olunmamış hesabatına istinadən yazıb.
Məlumata görə, əldə edilən vəsait Pxenyanın nüvə proqramını inkişaf etdirmək üçün istifadə olunub.
Müşahidəçilərin fikrincə, 2017-2023-cü illər arasında Şimali Koreyanın haker qrupları kriptovalyuta ilə bağlı şirkətlərə ən azı 58 kiberhücum həyata keçirib.
“Onlar bunu hələ də davam etdirirlər, həmçinin xarici müdafiə şirkətlərinə və kritik malların tədarük zəncirlərinə qarşı təxribatçı fəaliyyətlə məşğul olurlar”, – sənəddə qeyd olunur.
Diplomatlardan biri “Reuters”ə bildirib ki, hesabat rəsmi olaraq fevralın sonu və ya martın əvvəlində dərc edilməlidir. Şimali Koreya hesabatla bağlı şərh tələblərinə cavab verməyib. Pxenyan bundan əvvəl hakerlik və ya digər kiberhücumlarla bağlı ittihamları rədd edib.
“Chainalysis” analitikləri “The Wall Street Journal”a bildiriblər ki, onlar Şimali Koreyadan olan hakerlərin kriptohücumlarla beş il ərzində 3 milyard dollardan çox pul oğurladığını ehtimal edirlər. Hakerlərin qurbanlarından biri də müştərilərindən 600 milyon dollar oğurlanmış “Sky Mavis” oyun studiyasıdır.
Azpost.info
