Siyasi partiyalar hərbi vəziyyəti dəyərləndirib:"Bu çətinliklərə dözmək mümkündür"

“Təəssüf ki, hal-hazırda cəbhə xəttində olan vəziyyət barədə ətraflı məlumatımız yoxdur”.

Bunu Azadlıq Radiosuna Müsavat Partiyasının başqanı Arif Hacılı deyib. O, sentyabrın 27-də Azərbaycanda hərbi vəziyyət elan olunması ilə bağlı sualı cavablandırıb.

A.Hacılı hərbi qaydalara uyğun olaraq informasiyanın Müdafiə Nazirliyi tərəfindən monopoliyaya alındığını deyərək belə halda vəziyyəti şərh etməyin çətin olduğunu söyləyib: “Əgər deyildiyi kimi, Qarabağ istiqamətində ciddi hərbi uğurlarımız olacaqsa, Ermənistan danışıqlara və beynəlxalq hüquq normalarına uyğun Qarabağ probleminin tənzimlənməsinə razı olacaqsa, bu çətinliklərə dözmək mümkündür”.

O hesab edir ki, ölkədə hərbi vəziyyət və komendant saatının elan edilməsinin düzgün və ya yanlış qərar olmasını indidən söyləmək çətindir: “Yalnız döyüş əməliyyatlarının nəticələri ortalıqda olduqdan sonra vəziyyəti dəyərləndirmək imkanımız daha çox olacaq. Bir daha bildirmək istəyirəm ki, bizim real vəziyyət barədə yetərli informasiyamız yoxdur”.

ReAL Partiyasının təmsilçisi Natiq Cəfərli də deyib ki, hərbi vəziyyətin elan olunmasının əsas səbəbi Dağlıq Qarabağda və sərhədyanı rayonlarda vəziyyətin gərginləşməsidir. Onun deməsinə görə, Ermənistanın təcavüz və təxribatlarının ardı-arası kəsilmir. N.Cəfərli vurğulayıb ki, son zamanlar isə bu təxribatlar hətta adi vətəndaşların da həlak olmasına səbəb olub: “Naftalanda bir ailənin 5 üzvü həlak oldu”

Onun fikrincə, hərbi vəziyyət elan olunması bəzi qərarların alınmasının sürətlənməsinə xidmət edir: “Amma bunun uzan zaman davam edəcəyini də düşünmürəm. Bir neçə gündən bir neçə həftəyə kimi davam edə bilər. Mənə elə gəlir ki, Bakıda və digər şəhərlərdə elan olunmuş komendant saatı və s. sərt tədbirlər aradan qaldırılacaq. Bunun uzun zaman davam etməsinin elə də böyük önəmi və əhəmiyyəti olmayacaq”.

Yeni Azərbaycan Partiyasının (YAP) mətbuat xidmətinin rəhbəri Hüseyn Paşayev isə “Turan” agentliyinə bildirib ki, Azərbaycan uzun müddətdir işğal edilmiş torpaqlarının azad olunması yolunda səylərini əsirgəmirdi: “30 ilə yaxın idi ki, tapdaq altında qalan torpaqları qansız-qadasız Azərbaycanın ərazi bütövlüyü çərçivəsində diplomatik səylərlə azad etmək istəyirdi. Bu istiqamətdə səylərini əsirgəmirdi. Bütün bunlara baxmayaraq, Ermənistan və havadarları işğal edilmiş torpaqlardan geri çəkilmək istəmirdi. Amma sonunda Ermənistan bu istiqamətdə formal olan danışıqlar prosesinə də nöqtə qoydu. Bununla da işğal edilən Azərbaycan torpaqlarından çıxmayacaqlarını nümayiş etdirdi”.

Bir cavab yazın

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir

Əvvəlki məqalə

DİN ölkədə elan edilmiş komendat saatı ilə bağlı detalları açıqladı

Sonrakı məqalə

Fəaliyyətinə icazə veriləcək sahələrin siyahısı məlum olub