Son illərdə şəhər mühitinə uyğunlaşdırılmış mikromobil nəqliyyat vasitələri – xüsusilə elektrik skuter və velosipedlər – qısa məsafələr üçün əlverişli alternativ kimi geniş yayılıb.
AzPost xəbər verir ki, artıq Bakı da daxil olmaqla bir sıra şəhərlərdə bu vasitələrə xüsusi zolaqlar və parklanma yerləri ayrılıb. Lakin məsələ yalnız texniki infrastrukturla bitmir – istifadəçi mədəniyyəti bu inkişafın əsas dayağı olmalıdır.
Problem ondadır ki, bu nəqliyyat vasitələrindən istifadə edənlərin əksəriyyəti onlara sanki şəxsi əmlakları kimi davranmır. Kirayə götürülmüş skuter və velosipedlərin səkilərdə nizamsız şəkildə atılması adi hala çevrilib. Bəzi hallarda isə bu vasitələr yolun ortasında, piyada keçidlərində və ya yaşayış binalarının girişində qoyulur. Bu isə həm piyadaların hərəkətini məhdudlaşdırır, həm də şəhər estetikasına xələl gətirir.
Daha təhlükəlisi isə bu nəqliyyat vasitələri ilə səkidə hərəkət edilməsidir. Səkilər piyadalar üçündür – və bu məkanlarda yüksək sürətlə hərəkət edən skuter sürücüləri qəzaya səbəb ola bilər. Təsəvvür edin ki, arxasınca xəbərsizcə gələn bir skuterin təsirinə məruz qalan piyada bir addımla hansı təhlükəyə düşə bilər.
Hələlik bu məsələdə hüquqi boşluqlar da qalır. İctimai narahatlıq yaradan belə hallarda hansısa cərimə və ya inzibati tədbirin tətbiq olunub-olunmadığı qeyri-müəyyəndir. Halbuki İnzibati Xətalar Məcəlləsində piyadaların hərəkətinə mane olmağa görə məsuliyyət nəzərdə tutulur. Eyni zamanda, skuter və velosiped icarəsi təklif edən şirkətlərin də istifadəçilərə qarşı daxili cərimə mexanizmləri tətbiq etməsi mümkündür.
Mikromobil nəqliyyatın şəhər həyatına inteqrasiyası düzgün mədəniyyət və nəzarət olmadan mümkün deyil. Bu nəqliyyat vasitələri yalnız sürətli və rahat deyil, həm də məsuliyyət tələb edən texnologiyalardır. Əgər bu məsuliyyəti bölüşmək istəmiriksə, bu sahədə edilən bütün irəliləyişlər nəticəsiz qalacaq.
Skuter və velosipedlər şəhərləri daha yaşıl və rahat edə bilər – amma yalnız o halda ki, hərəkət və dayanma qaydaları da eyni sürətlə inkişaf etsin.
