Silvestr Stallone 80 yaşında yayımladığı “The Steps” adlı yeni memuarında aktyor Riçard Gir ilə uzun illər davam edən qarşıdurmasının təfərrüatlarını açıqlayıb.
Aktyor daha əvvəl kitabında xarici görünüşünə həddindən artıq aludə olması səbəbindən onda yaranan ağır bulimiyadan da bəhs edib. İndi isə Stallone digər Hollivud aktyoru ilə münasibətlərinin necə gərginləşdiyini xatırlayıb.
Münaqişə 1974-cü ildə başladı
Stallonenin sözlərinə görə, Gir ilə qarşıdurmanın başlanğıcı hələ 1974-cü ildə “The Lords of Flatbush” filmi üçün keçirilən kastinqə gedib çıxır. Həmin vaxt Robert De Niro və Riçard Gir də filmdə rol almaq üçün namizədlər arasında olub. Stallone bildirib ki, əvvəlcə Robert De Niro ilə çəkiliş sınaqları yaxşı keçib. Aktyor improvizasiyaları və kastinq prosesini bəyəndiyini qeyd edib.
Lakin Gir ilə səhnələr qısa müddətdə gərginləşib. “Əvvəlcə mənimlə De Niro arasında hər şey kifayət qədər yaxşı gedirdi. İmprovizasiyanı və prosesi bəyənirdim. Lakin Riçard Gir ilə improvizasiyalar yaxşı getməməyə başladı”, – deyə Stallone yazıb. Onun sözlərinə görə, səhnələrdən birində Gir köynəyindən onu möhkəm tutub və dırnaqları dərisinə batıb. Stallone ondan aralanmasını istəyib. Lakin ikinci dublda Gir eyni hərəkəti təkrarlayıb.
Stallone bildirib ki, Girin bu davranışı onda əvvəldən yığılıb qalan qəzəb və emosiyaları üzə çıxarıb.
“Ona dişlərini tökərdim”
Bundan sonra Stallone rejissor Stiven Veronadan Girin hərəkətinə real həyatda olduğu kimi reaksiya verməsinə icazə olub-olmadığını soruşub. Rejissor ondan “Nə edərdin?” deyə soruşanda Stallone “Ona dişlərini tökərdim” cavabını verib.
Verona isə aktyordan bunu etməməsini istəyib. Həmin vaxt fiziki dava baş verməsə də, iki aktyor arasındakı gərginlik davam edib. Stallonenin sözlərinə görə, növbəti insident nahar fasiləsində baş verib. Aktyorlar park edilmiş avtomobildə oturaraq yemək yeyiblər. Stallone Girə problem yaratmaması barədə xəbərdarlıq edib.
Lakin onun iddiasına görə, Girin yediyi toyuğun yağı ayağına tökülüb. “Buna cavab olaraq dirsəyimlə onun sinəsinə vurdum, avtomobildən çıxdım, onun tərəfinə keçdim və arxa oturacaqdan dartıb çıxardım”, – deyə Stallone xatırlayıb.
Onun sözlərinə görə, Gir isə “Ey, kişi, bunun fiziki qarşıdurmaya çevrilməsini istəmirəm” deyə reaksiya verib.
Bu zaman rejissor Verona iki aktyorun arasına keçib. Nəticədə məlum olub ki, vəziyyəti əvvəlki kimi davam etdirmək mümkün deyil və aktyorlardan biri layihəni tərk etməlidir. Rejissor Stalloneni filmdə saxlamaq, Giri isə layihədən çıxarmaq qərarına gəlib. Bundan qısa müddət sonra Robert De Niro da başqa layihəni seçərək filmdən ayrılıb. Onların yerinə aktyor heyətinə Perri Kinq və Henri Vinkler daxil olublar.
Qarşıdurma illər sonra da davam edib
Lakin Stallone ilə Gir arasındakı gərginliyin bununla bitmədiyi bildirilir. 2019-cu ildə Elton Con öz memuarında aktyorlar arasında daha bir qarşıdurmadan yazıb. Bu dəfə hadisənin mərkəzində Britaniya şahzadəsi Diana olub. Elton Conun sözlərinə görə, o, bir dəfə Stallone, Gir və Diana ilə birlikdə nahar edib və iki aktyor arasındakı gərginliyi hiss edib.
Daha sonra Stallonenin Gir və Diana arasındakı yaxınlaşmadan narazı olduğu təəssüratı yaranıb. Elton Con yazıb ki, aktyorların bir-birinə baxışlarından onların Diana məsələsinə görə münasibətlərini yumruq davası ilə aydınlaşdırmağa hazırlaşdıqları hiss olunurdu. Conun təsvirinə görə, Diana ilə Riçard Gir arasında yaranan yeni dostluq Stalloneni qane etməyib. O, hətta Stallonenin həmin məclisə xüsusi olaraq Diana ilə yaxınlaşmaq niyyəti ilə gəlmiş ola biləcəyini, lakin axşam üçün planlarının gözlədiyi kimi alınmadığını ehtimal edib.
Beləliklə, 1974-cü ildə film kastinqi zamanı başlayan Stallone–Gir qarşıdurması illər sonra Hollivudun məşhur simalarının şəxsi münasibətlərinə qədər uzanan uzunmüddətli hekayəyə çevrilib.
N.Talıblı
