Təyyarə
ABŞ vətəndaşı olan 44 yaşlı Reyçel Qrin təyyarə reysi zamanı həyatını itirib. Hadisə Minneapolisdən Londona həyata keçirilən uçuş zamanı baş verib. AzPost xəbər verir ki, bu barədə Britaniyanın The Mirror qəzeti məlumat yayıb.
Məlumata görə, qadın uçuş zamanı anasının çiyninə söykənərək yuxuya gedib. Bir müddət sonra onu oyatmaq mümkün olmayıb və bu zaman vəziyyətlə bağlı təşviş yaranıb. Təyyarə heyəti dərhal tibbi yardım göstərməyə çalışsa da, sərnişinin həyatını xilas etmək mümkün olmayıb.
Məhkəmə-tibbi ekspertizasının nəticələrinə əsasən, Reyçel Qrində əvvəlcədən aşkar olunmamış anadangəlmə ürək xəstəliyi olub. Araşdırma zamanı onun orqanizmində həkim təyinatı ilə qəbul edilən bəzi dərman vasitələri, o cümlədən antidepressantlar və melatonin də aşkar edilib.
Məhkəmə ölüm səbəbinin ürək patologiyası ilə qəbul edilən dərmanların birgə təsiri nəticəsində baş verdiyi qənaətinə gəlib. Ekspertiza zamanı dərmanların normadan artıq qəbulu və ya narkotik maddə istifadəsi ilə bağlı hər hansı fakt müəyyən olunmayıb.
Qeyd olunur ki, Reyçel Qrin Böyük Britaniyaya tarixi şəxsiyyət Eleonora Akvitaniyalı haqqında yazacağı kitab üzərində işləmək üçün səfər edirmiş.
