Rusiyanın Çelyabinsk şəhərində baş verən dəhşətli hadisə ictimaiyyəti sarsıdıb. Taksi sürücüsü avtomobildəki mübahisə zəminində gənc sərnişini boğaraq qətlə yetirib.
AzPost xəbər verir ki, bu barədə Çelyabinsk vilayəti üzrə Daxili İşlər Nazirliyinin Baş İdarəsi məlumat yayıb. Qətl hadisəsi mayın 22-nə keçən gecə baş verib. 24 yaşlı qız dostları ilə görüşdən sonra evə qayıtmaq üçün taksi sifariş edib.
Yolda naməlum səbəbdən sürücü ilə sərnişin arasında mübahisə yaranıb. Söz güləşməsi tezliklə faciəyə çevrilib və sürücü gənc qızı boğaraq öldürüb. Cinayətkar daha sonra cəsədi tikinti tullantıları ilə örtərək meşədə gizlətməyə çalışıb.
Hüquq-mühafizə orqanları hadisədən qısa müddət sonra sürücünün izinə düşüb. İlkin dindirmələrdə o, istintaqı çaşdırmaq üçün yalan ifadələr verib və hadisə ilə bağlı məlumatı inkar etməyə çalışıb.
Lakin toplanan sübutların təsiri altında sürücü törətdiyi cinayəti etiraf edib və meyiti gizlətdiyi yeri göstərib. Hazırda hadisə ilə bağlı istintaq davam edir və sürücünün digər cinayətlərdə iştirak edib-etmədiyi araşdırılır.
Qeyd edək ki, bu cür hadisələr son illər taksi xidmətlərində sərnişin təhlükəsizliyi məsələsini bir daha gündəmə gətirib. Mütəxəssislər gecə saatlarında tanımadığı sürücülərlə səfərlərin risklərini xüsusilə vurğulayır.
