“Fələstin məsələsinin yeganə həlli 1967-ci il sərhədləri daxilində paytaxtı Şərqi Qüdsdə olan müstəqil, suveren və coğrafi cəhətdən inteqrasiya olunmuş Fələstin dövlətinin yaradılmasıdır”.
AzPost bildirir ki, bu sözləri Türkiyə prezidenti Ərdoğan Misirdə keçirilmiş Yaxın Şərq Sülh sammitindən qayıdarkən təyyarədə jurnalistlərə açıqlamasında deyib.
Qəzzada atəşkəslə bağlı imzalanmış saziş barədə danışan Ərdoğan vurğulayıb ki, bu prosesdə razılaşmanın əsl mənasında həyata keçirilməsi çox vacibdir. Girovların və əsirlərin mübadiləsi həlledicidir.
“Müqaviləyə Fələstin məsələsini həll edən sənəd kimi baxmaq yanlışdır. Bu müqavilənin özü atəşkəsdir. Fikrimizcə, Fələstin məsələsinin yeganə həlli 1967-ci il sərhədləri daxilində paytaxtı Şərqi Qüdsdə olan müstəqil, suveren və coğrafi cəhətdən inteqrasiya olunmuş Fələstin dövlətinin yaradılmasıdır. Türkiyə olaraq bunun üçün qətiyyətlə işləməyə davam edəcəyik”- deyə Ərdoğan bildirib.
O, qeyd edib ki, çətin bir proseslə üz-üzəyik. “Hər şeydən əvvəl biz İsrail hökumətinin verdiyi vədləri yerinə yetirməsini təmin etməliyik, çünki İsrailin bu məsələdə təcrübəsi son dərəcə mənfidir. Bu baxımdan inanıram ki, İsrailə, xüsusən də Amerikaya təsir edənlər bundan sonra da lazım olan hər şeyi edəcəklər”.
Ərdoğanın sözlərinə görə, uzun illərdən sonra ilk dəfə olaraq Fələstin məsələsi bəşəriyyətin ortaq gündəminə çıxarılıb: “Türkiyə, ABŞ və digər ölkələr bu atəşkəsi saxlamaqda qərarlıdır. İsrail soyqırıma qayıtsa, bunun bədələni pis ödəyəcəyini bilir. Bunu hər fürsətdə açıqlayırıq. Keçmişdə əldə edilmiş bir çox razılaşmalar kağız üzərində qaldı. İndi məsələ daha güclü və birləşmiş iradəndir. Biz Misirdə keçirilən sammitdə bu ümumi cəhəti bir daha gördük. İnanıram ki, cənab Tramp qabaqcıl olduğu bu prosesi dəstəkləməyə davam edəcək. Bu hadisələr təkcə bizim deyil, həm də ölkələrin, xalqların ümidinə və istəyinə çevrilib. Heç kim keçmişə qayıtmağa razı ola bilməz. Çünki bu atəşkəs icmaların vicdanı və sağlam düşüncəsi ilə təmin edilib”.
Türkiyə prezidenti vurğulayıb ki, ABŞ lideri Tramp bu prosesin əsas iştirakçısı olacaq. O, açıqlamasında bunu dilə gətirib: “Sammitdə son dəfə danışanda ayağa qalxıb dedi ki, bu prosesdə mənim öhdəmə nə düşürsə gəlin telefon əlaqələrimizi yaradaq, bu telefon diplomatiyasına laqeyd yanaşmayaq. Bütün səviyyələrdə görüşlərimizi davam etdirəcəyik. Cənab Trampla qurduğumuz bu diplomatiya çox vacibdir”.
