ABŞ Prezidenti Donald Tramp Rusiya ilə Ukrayna arasında müharibənin dayandırılması istiqamətində səylərin irəliləyişə yaxınlaşdığını düşünür.
“Fox News”un məlumatına görə, o, bu barədə noyabrın 17-də, çərşənbə axşamı Manilada Hindistan, Yaponiya və Avstraliya liderləri ilə fotosessiya zamanı jurnalistlərə açıqlamasında bildirib.
“Düşünürəm ki, buna nail olmağa çox yaxınıq”, – deyə Tramp qeyd edib.
Onun sözlərinə görə, müharibə çoxlu sayda insanın həyatına son qoyur. ABŞ prezidenti aylıq itkilərin, onun iddiasına görə, təxminən 25 min nəfər olduğunu bildirib. Tramp ötən ay bu göstəricinin 32 minə çatdığını söyləyib.
Tramp münaqişənin nizamlanması məsələsini Rusiya Prezidenti Vladimir Putin və Çin Sədri Si Cinpinlə keçirilməsi planlaşdırılan danışıqlarda müzakirə etməyə ümid edir. Üç liderin görüşü bu həftə Çinin Şençjen şəhərində Asiya-Sakit Okean İqtisadi Əməkdaşlıq Təşkilatının (APEC) sammiti çərçivəsində nəzərdə tutulub.
ABŞ prezidenti fürsət yaranacağı təqdirdə Putinlə ayrıca görüş keçirməsini də istisna etməyib.
“CBS News” və “Associated Press”in məlumatına görə, Trampın Asiyaya səfəri beynəlxalq təhlükəsizlik, eləcə də ticarət-iqtisadi münasibətlərlə bağlı danışıqları əhatə edir.
