Serbiyanın paytaxtı Belqradda minlərlə vətəndaş NATO-nun 1999-cu ildə bombaladığı keçmiş hərbi qərargahın yerində tikinti aparılmasına qarşı etiraz aksiyası keçirib. AzPost “The Guardian” nəşrinə istinadla xəbər verir ki, aksiya ABŞ-ın sabiq prezidenti Donald Trampın kürəkəni Cared Kuşnerin adı ilə bağlı olan layihəyə qarşı yönəlib.
Etirazçılar hesab edirlər ki, həmin bina – Yuqoslaviya ordusunun keçmiş qərargahı – NATO-nun hücumu zamanı həlak olanların xatirəsini yaşadan mühüm simvoldur və onu kommersiya məqsədilə otelə çevirmək tarixi yaddaşa hörmətsizlik sayılır.
Serbiya parlamenti ötən həftə Kuşnerə məxsus “Affinity Global Development” şirkətinə layihəni həyata keçirmək üçün inzibati icazələrin sürətləndirilməsinə imkan verən qanun qəbul edib. Bu sənəd tikinti prosesini asanlaşdırsa da, ölkə daxilində geniş narazılıq yaradıb.
Aksiya iştirakçısı, 48 yaşlı Teodora Smilyaniç bildirib ki, “bu qərarla prezident Vuçiç Trampa xoş gəlmək və Qərbə yarınmaq istəyir”. Müxalifət nümayəndələri qanunun Konstitusiyaya zidd olduğunu söyləsələr də, hakim partiya sənədi dəyişikliksiz təsdiqləyib.
Qeyd olunur ki, hökumət ötən ilin noyabrında keçmiş qərargah binasının “mədəni irs” statusunu ləğv edib. Bu addım, layihənin qarşısında duran hüquqi maneələri aradan qaldırmaq məqsədi daşıyıb.
Prezident Aleksandr Vuçiç “Pink TV”yə açıqlamasında deyib ki, “biz torpağı təqdim edirik, amerikalılar isə azı 753 milyon dollar həcmində sərmayə qoyur. Bu, Serbiya üçün mühüm iqtisadi fürsətdir”.
Vuçiçin sözlərinə görə, otel və yaşayış kompleksinin inşası Belqradın iqtisadi dəyərini artıracaq və turizmə böyük təkan verəcək: “Layihənin ümumi dəyəri bir milyard avronu keçəcək”.
Məlumata görə, Cared Kuşner 2021-ci ildə Ağ Evi tərk etdikdən sonra “Affinity Global Development” şirkətini təsis edib. Onun daha iri holdinqi – “Affinity Partners” – hələlik bu məsələ ilə bağlı “Reuters”in sorğusuna cavab verməyib.
