“Türk Hava Yolları” şirkəti Rusiya vətəndaşlarını Latın Amerikası ölkələrinə uçuşlara buraxmırlar.
Azpost.info bildirir ki, bu barədə RBC-yə diplomatik nümayəndəliyin mətbuat xidməti məlumat verib.
Rusiyanın Türkiyədəki səfirliyi ruslara “Türk Hava Yolları”nın xidmətlərindən istifadənin məqsədəuyğunluğu barədə diqqətlə düşünməyi tövsiyə edib.
“Problem ciddidir. Türkiyə rəsmilərinin bunun ciddiliyindən nə dərəcədə xəbərdar olduğu bizə aydın deyil. Rusiyanın İstanbuldakı Baş Konsulluğu aviaşirkətin diqqətini yaranmış qeyri-sağlam vəziyyətə yönəldib. Səfirlik də öz növbəsində Türkiyə Xarici İşlər Nazirliyi ilə həm yazılı, yəni rəsmi nota ilə, həm də şifahi şəkildə əlaqə saxlayıb. Hələlik dəqiq cavab verilməyib”, – deyə onlar qeyd ediblər.
Səfirliyin məlumatına görə, son həftələrdə İstanbul hava limanından tranzitlə Latın Amerikasına keçən Rusiya vətəndaşlarının təyyarəyə buraxılmaması halları olub.
Şirkət işçiləri təyinat ölkələrinin rusların qəbulu üçün ciddi qaydalar müəyyən etdiyinə istinad edirlər. Bu tələblərə aşağıdakılar daxildir: geri dönüş biletinin olması, nağd pul, mehmanxana rezervasiyasının təsdiqi, səyahətin məqsədi turizmdən başqa olduqda müvafiq təsdiqedici sənədlər və s.
2023-cü ilin yanvarında Rusiya Turizm Operatorları Assosiasiyası bildirmişdi ki, Meksikadakı sərhədçilər ölkədən tranzit zona kimi istifadə hallarının artması səbəbindən rusları daha az buraxmağa başlayıblar. “Fakt budur ki, son vaxtlar rusların Meksikaya yalnız ABŞ-la sərhədi keçmək və qeyri-qanuni olaraq Amerikada qalmaq məqsədi ilə gəldiyi hallar getdikcə daha çox olur. Bu cür cəhdləri dayandırmaq üçün Meksikadakı immiqrasiya məmurları giriş üçün lazım olan bütün sənədləri, o cümlədən geri dönüş biletini əvvəlkindən daha diqqətlə yoxlayır”, – ATOR izah edib.
