Honq-Konqun Kwun Tong rayonundakı yaşayış kompleksində dəhşətli hadisə qeydə alınıb. AzPost xəbər verir ki, üç yaşlı qız anasının meyiti ilə dörd gün eyni mənzildə tək qalıb.
South China Morning Post-un yaydığı məlumata əsasən, uşağın davamlı ağlaması qonşuların diqqətini çəkib və onlar kompleksin mühafizəsi ilə əlaqə saxlayıblar. Mənzilin sahibi qapını açmadıqda, hadisə yerinə polis çağırılıb.
Hüquq-mühafizə orqanlarının əməkdaşları mənzilə daxil olduqda azyaşlı qızı anasının cəsədinin yanında, çarpayıda uzanmış vəziyyətdə görüblər.
Məhkəmə-tibbi ekspertizası ananın astma xəstəliyindən vəfat etdiyini, ölümün dörd gün əvvəl baş verdiyini müəyyənləşdirib. Bu müddət ərzində uşaq aclıqdan ölməmək üçün evdə olan quru yeməklərlə qidalanıb.
Həkimlərin verdiyi məlumata görə, uşağın səhhəti hazırda qənaətbəxşdir və o, sosial xidmət orqanlarının nəzarəti altında müvəqqəti olaraq xəstəxanaya yerləşdirilib.
