“Cənubi Qafqazdakı vəziyyətin nizamlanması üçün Ermənistan, Rusiya və Azərbaycan liderlərinin üçtərəfli bəyanatlarının alternativi yoxdur”.
Azpost.info xəbər verir ki, bunu Moskvada Azərbaycan və Ermənistan XİN rəhbərləri ilə üçtərəfli görüşdə Rusiyanın xarici işlər naziri Sergey Lavrov deyib.
“Üçtərəfli bəyanatlarda davamlı həll yollarına nail olmaq üçün yol xəritəsi var. Biz Cənubi Qafqaz ətrafında vəziyyəti təhlil etdik, inanırıq ki, liderlərimizin razılaşmalarına alternativ yoxdur. Rusiya regionda sülh və sabitliyin olmasını istəyir. Burada Rusiyanın birbaşa maraqları var. Rusiya vəziyyətin sabitləşməsi ilə bağlı qərarların icrasını təmin etmək üçün hər cür səy göstərəcək. Ümid edirik ki, regionda iştirak etməkdə maraqlı olan bütün digər ölkələr buna hörmətlə yanaşacaqlar”, – Lavrov bildirib.
Lavrov Qarabağda və Ermənistanla Azərbaycan sərhədində vəziyyətin sabitləşdirilməsinin, humanitar problemlərin həllinin, nəqliyyat kommunikasiyalarının açılmasının və sülh sazişinin mətninin razılaşdırılmasının vacibliyini qeyd edib.
O, ekspertlər, ictimai təşkilatlar, deputatlar arasında əlaqələrin inkişaf etdirildiyini əlavə edib: “Bu təcrübə artıq olub və bu, həm də etimadın yaradılmasında mühüm addım olacaq”.
Üçtərəfli formatda Lavrov Ermənistan-Azərbaycan münasibətlərinin normallaşdırılması məsələlərinin bütün spektrinə baxmağı və Rusiyanın imkanlarını nəzərə alaraq gələcək addımların razılaşdırılmasını təklif edib.
Azpost.info
