Sentyabrın 22-nə keçən gecə Ukraynaya məxsus “onlarla” pilotsuz uçuş aparatı Rusiyanın Samara vilayətinə hücum edib.
Azpost.info bildirir ki, bu barədə vilayətin qubernatoru Vyaçeslav Fedorişşev məlumat verib.
“Düşmən sənaye müəssisələrini hədəfə alıb. Təəssüf ki, mülki obyektlərə, o cümlədən fərdi yaşayış evlərinə və avtomobillərə ziyan dəyib”, – Fedorışşev “Telegram” kanalında yazıb.
O, hücum nəticəsində xəsarət alanların olub-olmadığını açıqlamayıb. Qubernator zərbələrin nəticələrinin foto və videosunun yayımlanmasına qoyulan qadağanı da xatırladıb.
Astra nəşri hadisə şahidlərinin yaydığı görüntülər əsasında Samara şəhərində PUA-ların hədəfinin Kuybışev neft emalı zavodu olduğunu müəyyənləşdirib. Hücumdan sonra zavodda güclü yanğın baş verib.
Müəssisə “Rosneft” şirkətinə məxsusdur və regionun ən böyük neft emalı zavodlarından biri hesab olunur. Zavodun nominal emal gücü ildə 7 milyon ton neft təşkil edir.
2024-cü ildə müəssisədə 4,7 milyon ton neft xammalı emal olunub. Zavod həmin il 0,8 milyon ton avtomobil benzini, 1,4 milyon ton dizel yanacağı və 1,3 milyon ton mazut istehsal edib.
Bundan əvvəl müəssisə bu ilin iyun ayında da dron hücumuna məruz qalmışdı. Reuters-in sənaye sahəsindəki mənbələrinin məlumatına görə, həmin hücumdan sonra zavod neft emalını dayandırmışdı.
