23 oktyabr 2025-ci il tarixində “Qarabağ Əlillərinə Qayğı” İctimai Birliyinin iclas zalında QHT-lərə Dövlət Dəstəyi Agentliyinin maliyyə dəstəyi ilə həyata keçirilən “Vətən Torpağını Qanları ilə Suvaranlar” adlı layihə çərçivəsində ilk tədbir baş tutub.
Tədbir şəhidlərimizin xatirəsinin bir dəqiqəlik sükutla yad edilməsi və Dövlət himninin səsləndirilməsi ilə başlayıb. Daha sonra “Qarabağ Əlillərinə Qayğı” İctimai Birliyinin sədri və layihə rəhbəri Firidun Məmmədov çıxış edərək tədbiri açıq elan edib. O, layihənin həyata keçirilməsinə verdiyi maliyyə dəstəyinə görə QHT-lərə Dövlət Dəstəyi Agentliyinə təşəkkürünü bildirib, son illərdə Agentlik tərəfindən vətəndaş cəmiyyətinin inkişafı və ictimai birliklərlə iş sahəsində aparılan ciddi islahatlardan danışıb.
“Layihənin əsas məqsədi Azərbaycanın ərazi bütövlüyü uğrunda canını və sağlamlığını qurban vermiş qəhrəmanların təbliği, onların göstərdiyi şücaətin gənc nəsil üçün örnək kimi təqdim olunması və vətənpərvərlik ruhunun yüksəldilməsidir”.
Daha sonra tədbir iştirakçıları layihə barədə fikir və təkliflərini səsləndiriblər. Birinci Qarabağ müharibəsinin iştirakçısı, tabor komandiri olmuş, ağır yaralanmış birinci dərəcəli müharibə əlili, istefada olan polkovnik-leytenant Qurban Sadıxzadə çıxış edərək bu kimi vacib layihələrin həyata keçirilməsində dəstək göstərən təşkilatlara minnətdarlığını bildirib. O, həmçinin müharibə əlilləri, veteranlar və şəhid ailələrinin daha geniş təbliğ olunmasının vacibliyini vurğulayıb.
Birinci Qarabağ döyüşçülərindən biri, düşmənin üç tankını məhv etmiş kəşfiyyatçı qazi Dönməz Həsənov belə layihələrin daha tez-tez təşkil edilməsinin önəmini qeyd edib. Birinci Qarabağ müharibəsində bir ayağını və gözünü itirmiş qazi Səyyaf Məmmədov isə ictimaiyyətlə görüşlərdə qazilərə göstərilən xüsusi diqqət və qayğının artdığını vurğulayıb. Müharibədə qardaşını şəhid verən və iki ayağını itirmiş Əkrəm Rzayev çıxışında şəhidlərə və qazilərə dövlət tərəfindən göstərilən yüksək dəyərdən danışıb.
Digər iştirakçılar da söz alaraq layihənin əhəmiyyətini yüksək qiymətləndiriblər və Ali Baş Komandanın əmrlərinə hər zaman hazır olduqlarını bildiriblər.
Tədbirin sonunda iştirakçılara xatirə hədiyyələri təqdim olunub.
