StarexGlobal
Vətəndaş Starexglobal.az kargo şirkətinin xidmətindən narazılıq edib.
AzPost xəbər verir ki, onun sözlərinə görə, Temu platformasından sifariş etdiyi bağlama sistemdə “təhvil verildi” kimi göstərilsə də, real olaraq ona çatdırılmayıb.
Şikayətçi bildirir ki, dəfələrlə müraciət etməsinə baxmayaraq, şirkət tərəfindən bağlamanın taleyi ilə bağlı dəqiq məlumat təqdim olunmayıb. Vətəndaş hesab edir ki, bu hal istehlakçı hüquqlarının pozulması ilə yanaşı, daşınma xidməti üzrə öhdəliklərin yerinə yetirilməməsi deməkdir.
Hüquqşünasların sözlərinə görə, “İstehlakçıların hüquqlarının müdafiəsi haqqında” Qanuna əsasən, vətəndaş aldığı xidmətin keyfiyyətli və müqaviləyə uyğun şəkildə göstərilməsini tələb etmək hüququna malikdir. Əgər bağlama təhvil verilməyibsə, şirkət bunun səbəbini izah etməli və müştərinin maddi zərərinin qarşılanmasını təmin etməlidir.
Bundan əlavə, Mülki Məcəlləyə əsasən, daşıyıcı bağlamanın qorunmasına və ünvan sahibinə təhvil verilməsinə görə məsuliyyət daşıyır. Müştərinin razılığı olmadan bağlamanın başqa şəxsə verilməsi və ya saxlanılması hüquqi pozuntu sayılır.
Mütəxəssislər bildirirlər ki, belə hallarda vətəndaş əvvəlcə şirkətə yazılı formada müraciət etməli, cavab alınmadığı halda isə Antiinhisar və İstehlak Bazarına Nəzarət Dövlət Xidmətinə və məhkəməyə şikayət edə bilər.
