“Üfüq Xeyriyyə” Cəmiyyəti İctimai Birliyi Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə “Bullinqə məruz qalan məktəblilər arasında ictimai vəkillik” layihəsini həyata keçirir.
Layihənin məqsədi bullinqə məruz qalan və məruz qalma təhlükəsi ilə üzləşən, şagird davranış qaydalarına əməl etməyən uşaqlar arasında maarrifləndirmə işlərinin aparılması, onların psixoloji vəziyyətlərinin qiymətləndirilməsi, öz hüquqlarını müdafiə etmələrini təmin etmək üçün hüquqi, sosial və psixoloji istiqamətlər üzrə ictimai vəkilliyin aparılmasıdır.
25 oktyabr 2025-ci il tarixində baş tutan təlimdə layihə rəhbəri Nuriyyə Abbasova çıxışında layihənin əsas məqsədi və bullinq mövzusunun aktuallığından bəhs etmişdir. Təlim Xırdalan şəhərində yerləşən 1 saylı məktəbdə həyata keçirilmiş və 25-dən çox valideyn cəlb edilmişdir. Təlimçi Sara Ağayeva tərəfindən “Bullinq nədir?” adlı maarifləndirici və interaktiv təlim keçirilmiş, təlimdə bullinq haqqında ümumi məlumat verilmiş, təlim zamanı valideynlər arasında keçirilən müzakirə və rol oyunları sayəsində “Bullinqin uşaqların psixologiyasına akademik göstəricilərinə, sosial həyatlarına təsiri və valideynlərin rolu”, “Bullinq edən uşaqların davranışları: Valideynlər üçün siqnallar” kimi mövzulardan bəhs edilmişdir.
Təlimin növbəti sessiyasında psixoloq Aytac Hətəmli bullinqə məruz qalma hallarını aşkara çıxarmaq məqsədilə məktəblilər üçün keçirdiyi “Kaktus” terapiyasında çəkilmiş rəsmlərin izahını və məktəblilərin həyatına təhlükə yarada biləcək məqamlar barədə valideynlərlə müzakirələr aparmışdır. Bu terapiyanın məqsədi uşaqların həm zoralığa, həm də bullinqə məruz qalma hallarını müəyyən etmək və valideynlərə nə etməli olduqlarını çatdırmaq olmuşdur.
Daha sonra sosial işçi Günel Baxışova və hüquqşünas Qəmərcan Xasayzadə tərəfindən 15 valideynin sosial və hüquqi qiymətləndirilməsi aparılmışdır. Eyni zamanda valideynlərlə birgə valideyn komitələrinin yaradılacağından bəhs edilmişdir.
