“Avropa İttifaqının bir hissəsi olan dövlətlər suverenliyini qorumaq və öz vətəndaşlarının maraqlarını müdafiə etmək istəyirlərsə, onların yalnız bir yolu qalır – bu qurumdan çıxmaq”.
Azpost.info xəbər verir ki, bunu Rusiya Dövlət Dumasının sədri Vyaçeslav Volodin Avropa Parlamentinin Avropa İttifaqında (Aİ) islahatlarla bağlı qərarını şərh edərkən bildirib.
Volodinin sözlərinə görə, Avropa Parlamenti Aİ üzvlərinin veto hüququndan imtina etməsini təklif edir: “Ayrı-ayrı dövlətlərin və onların vətəndaşlarının fikirləri nəzərə alınmayacaq və bu, milyonlarla avropalının səsvermə hüququndan məhrum edilməsinə gətirib çıxaracaq”.
Avropa Parlamenti Aİ-də islahatlara dair qətnaməni mayın 4-də qəbul edib. Sənəd “Avropanın Gələcəyi” konfransı çərçivəsində il ərzində Avropa ölkələrinin rezidentləri ilə ictimai məsləhətləşmələr nəticəsində qəbul olunub. Sənəddə ən mühüm qərarların yekdilliklə qəbul edilməsi prinsipinin ləğvi təklif olunur.
“Yekdilliklə qərara alınan bütün məsələlər müvafiq səs çoxluğu (iştirak edənlərin üçdə ikisi və ya dörddə üçü-red) ilə həll edilməlidir”, – sənəddə deyilir. Avropa Parlamenti üzvlərinin fikrincə, yekdilliklə qərar qəbuletmə mexanizmi razılaşmanı çətinləşdirir.
Azpost.info
