Qida məhsulunu üzərindəki qiymətdən baha satdığına görə şirkətə inzibati protokol tərtib olunub.
“Viva Desserts” MMC qiymət pozuntusuna yol verdiyi üçün inzibati məsuliyyətə cəlb edilib. AzPost bildirir ki, bu barədə məlumatı Prezident yanında Antiinhisar və İstehlak Bazarlarına Nəzarət Dövlət Agentliyi yayıb.
Agentliyin açıqlamasına əsasən, şirkət “İstehlakçıların hüquqlarının müdafiəsi haqqında” qanunu pozaraq qida məhsulunu üzərində göstərilən qiymətdən baha satıb. Bu hal İnzibati Xətalar Məcəlləsinin 447.0.1-ci bəndinə uyğun olaraq istehlakçının az miqdarda aldadılması kimi qiymətləndirilib.
Nəticədə şirkət barəsində inzibati xəta protokolu tərtib olunub və məsələ ilə bağlı müvafiq hüquqi prosedurlar başladılıb.
Qeyd edək ki, bu bəndə əsasən, malın etiketində göstərilən qiymətlə kassada tələb olunan məbləğ arasında fərq olduğu təqdirdə, bu, istehlakçının hüquqlarının pozulması hesab olunur və inzibati cəza ilə nəticələnə bilər.
Agentlik vətəndaşlara çağırış edərək bu kimi hallarla qarşılaşdıqları zaman dərhal müvafiq qurumlara məlumat verməyi tövsiyə edib. Məqsəd istehlakçıların hüquqlarının qorunması və bazarda ədalətli rəqabətin təmin olunmasıdır.
