Yaşıl çay orqanizm üçün faydalı içkilərdən biri sayılsa da, fastfud və şəkərli qidalarla birlikdə qəbul edildikdə onların mənfi təsirini aradan qaldıra bilmir.
AzPost xəbər verir ki, bu barədə Perm Politex Universitetinin “Kimya və biotexnologiya” kafedrasının dosenti, farmasevtika üzrə fəlsəfə doktoru Anastasiya Boteva məlumat verib. Onun sözlərinə görə, fastfuddan alınan kalorilər bədəndə qalır və yaşıl çay yağların və şəkərlərin parçalanmasına təsir göstərmir.
Boteva qeyd edib ki, şirniyyat və zərərli qidaların tez-tez qəbulu “zərərli qidalanma vərdişlərinin” daimi hal almasına səbəb olur. Bu, həm artıq çəki, həm də maddələr mübadiləsi pozğunluqları riskini artırır.
Təbiətcə antioksidantlarla zəngin olan yaşıl çay faydalı içki olsa da, onun təsiri yalnız sağlam qidalanma və balanslı rasionla müşayiət edildikdə özünü göstərir.
Eyni zamanda ROSBİOTEX Universitetinin terapevtika kafedrasının müdiri Aleksandr Konkov xəbərdarlıq edib ki, çox isti içkilər sağlamlıq üçün təhlükəlidir. 60–65°C-dən yuxarı temperaturda içilən çay ağız və qida borusunun selikli qişasında mikroyanıqlara səbəb olur.
Mütəxəssis bildirib ki, bu cür xırda zədələnmələr uzunmüddətli dövrdə xroniki iltihabi proseslərə və hətta şiş riskinin artmasına gətirib çıxara bilər.
