Cəfəri sadəcə yeməklərə bəzək qatmaq üçün deyil, bədəni təmizləyən və gəncliyi qoruyan təbii gücdür. AzPost xəbər verir ki, “Akademik Roytberq klinikası”nın həkim-qastroenteroloqu Yevgeni Belousov “Championat.ru”ya açıqlamasında bu sadə yaşıl otun orqanizm üçün müstəsna əhəmiyyətindən danışıb.
Onun sözlərinə görə, cəfəri tərkibindəki zəngin vitaminlər və bioloji aktiv maddələr sayəsində həm ürəyi, həm də qan damarlarını qoruyur. Cəfərinin cəmi 30 qramı — yəni kiçik bir dəstəsi — insanın sutkalıq K vitamini tələbatını tam, C vitamini ehtiyacını isə 80 faiz təmin edir. Bu vitaminlər qan dövranını gücləndirir, sümükləri möhkəmləndirir və immun sistemini aktivləşdirir.
Mütəxəssis qeyd edib ki, cəfəri həm də provitamin A (beta-karotin) mənbəyidir və bu maddə görməni yaxşılaşdırır, dərinin sağlam görünməsinə yardım edir. Bitkinin tərkibindəki dəmir, kalium və kalsium mineralları ürək əzələsini möhkəmləndirir, təzyiqi tənzimləyir və qan azlığının qarşısını alır.
Belousovun fikrincə, cəfərinin əsas dəyəri təkcə vitaminlərlə bitmir. Onun tərkibindəki flavonoidlər — apigenin və luteolin — güclü antioksidant təsir göstərir. Bu maddələr hüceyrələrin qocalmasını ləngidir, xərçəng və xroniki iltihab riskini azaldır.
Cəfərinin efir yağları, xüsusilə miristin və apiol maddələri həzmi yaxşılaşdırır, öd ifrazını stimullaşdırır və mədədəki ağırlığı aradan qaldırır. Buna görə də o, mədə-bağırsaq sistemi zəif olan insanlar üçün çox faydalıdır.
Mütəxəssis əlavə edib ki, bu yaşıl ot immuniteti möhkəmləndirir, orqanizmin viruslara qarşı müqavimətini artırır. Cəfərinin tərkibindəki C və E vitaminləri orqanizmdə müdafiə mexanizmini aktivləşdirir, soyuqdəymə və infeksiyalardan qoruyur.
Dəriyə gəldikdə isə, cəfəri təbii gözəllik vasitəsidir. Onun şirəsi dərinin tonunu bərabərləşdirir, ləkələri azaldır və piqmentasiyanın qarşısını alır. Göz ətrafındakı şişkinliyi və qaranıqlığı azaltmaq üçün cəfəri dəmləmələri uzun illərdir xalq təbabətində istifadə olunur.
Lakin həkim xəbərdarlıq edir ki, cəfərinin faydaları qədər ehtiyatla yanaşılmalı məqamları da var. Tərkibindəki apiol maddəsi uşaqlığın yığılmalarını artırdığı üçün hamilə qadınlara çox miqdarda cəfəri və ya onun dəmləməsini qəbul etmək məsləhət görülmür. Həmçinin K vitamini ilə zəngin olduğuna görə, qan durulducu dərmanlar qəbul edənlər onun miqdarına diqqət etməlidirlər.
Qastroenteroloq tövsiyə edir ki, gündə 50–70 qramdan çox cəfəri qəbul edilməsin. Ən faydalı üsul onu təzə halda salatlara, balıq və tərəvəz yeməklərinə əlavə etməkdir. Cəfəri yeməklərin sonunda qatıldıqda vitaminlərini daha yaxşı qoruyur.
Belousov yekunda vurğulayıb: “Cəfəri sadə görünsə də, o, damarları möhkəmləndirən, dərini canlandıran və bədəni təmizləyən güclü təbii vasitədir. Əgər onu müntəzəm və ölçülü şəkildə qəbul etsəniz, bu yaşıl yarpaqlar sağlamlığınız üçün əsl möcüzəyə çevrilə bilər”.
