Ölüm
Ukraynanın Odessa şəhərində azyaşlı uşağın zorakılığa və qətlə məruz qalması ilə nəticələnən ağır cinayət hadisəsi baş verib.
AzPost xəbər verir ki, Ukrayna mediasının məlumatına görə, iyunun 18-də axşam saatlarında yeddi yaşlı Solomiya adlı qız evlərinin yaxınlığında skuterlə oynayarkən itkin düşüb. Axtarışlara dərhal başlanılıb – yaxınları, könüllülər və hüquq-mühafizə orqanları gecə boyu onu axtarıblar. Təəssüf ki, səhər saatlarında azyaşlının meyiti binanın girişində, pilləkənaltı qutulardan birində tapılıb.
Cinayət şübhəlisi kimi həmin binada yaşayan 32 yaşlı şəxs saxlanılıb. Rəsmi məlumata görə, o, dindirilmə zamanı uşağa qarşı törətdiyi əməlləri etiraf edib. Hüquq-mühafizə orqanları faktla bağlı istintaqa başlayıb.
Ukrayna Daxili İşlər Nazirliyi və Odessa Prokurorluğu hadisəni nəzarətə götürüb. Hadisə təkcə yerli əhalidə deyil, bütün ölkədə kəskin ictimai reaksiya doğurub. Hüquq müdafiəçiləri və uşaq psixoloqları azyaşlıların təhlükəsizliyinin gücləndirilməsi ilə bağlı yeni çağırışlar ediblər.
Rəsmi qurumlar əhalini sarsıdıcı detalların paylaşılmamasına, sosial mediada yayılan bəzi görüntülərə qarşı ehtiyatlı olmağa çağırır. İstintaq davam edir.
