Müasir dövrdə tələblərin durmadan artdığı, vaxtın isə daim çatmadığı bir şəraitdə “yox” deməyi bacarmaq həyati əhəmiyyət daşıyan bir bacarıq sayılır. Azpost xəbər verir ki, psixoloq Mariya İqnateva “MK” internet nəşrinə açıqlamasında bildirib ki, bu, eqoizm deyil, insanın özünü qoruması və şəxsi, eləcə də peşəkar harmoniyaya aparan yoldur.
Onun sözlərinə görə, istənilməyən öhdəliklərdən imtina etdikdə insan vaxt, enerji və diqqət kimi dəyərli resurslarını azad etmiş olur. Bu isə əsas prioritetlərə fokuslanmağa, sevilən məşğuliyyətlərə daha dərindən vaxt ayırmağa və yaxın insanlarla ünsiyyəti gücləndirməyə imkan verir.
Psixoloq qeyd edib ki, bir çox hallarda “yox” demək çətin olur. İnsanlar qarşı tərəfi incitməkdən, qeyri-peşəkar görünməkdən və ya fürsəti əldən verməkdən qorxurlar. Lakin mütəxəssisin fikrincə, düzgün şəkildə imtina etmək zəiflik yox, yetkinlik və şüurluluq əlamətidir.
İqnateva vurğulayıb ki, uğurlu imtinanın açarı mövqeyi aydın və inamla ifadə etməkdir. Özünü doğrultmağa çalışmadan və günahkarlıq hissi keçirmədən “yox” demək vacibdir. Eyni zamanda qarşı tərəfin xahişinə hörmət göstərmək, lakin öz mövqeyində qəti qalmaq lazımdır. Bəzən quru “yox” əvəzinə alternativ yol təklif etmək və ya kömək edə biləcək başqa birini məsləhət görmək də mümkündür.
Psixoloqun sözlərinə görə, “yox” deməyi bacarmaq insanın öz rifahına qoyduğu sərmayədir. Uyğun olmayan şeylərdən imtina etməklə, insan öz ehtiyac və məqsədlərinə daha uyğun imkanlara yol açır. Bu isə daha xoşbəxt, dolğun və uğurlu həyata aparan bir yoldur.
