kütləvi zəhərlənmə
Dağıstanın Maqaramkent rayonunda baş verən kütləvi zəhərlənmə hadisəsi yerli əhalini təşvişə salıb. AzPost xəbər verir ki, rəsmi məlumatlara görə, 100-dən çox sakin su içdikdən sonra zəhərlənmə əlamətləri ilə xəstəxanaya yerləşdirilib.
RİA Novosti agentliyi bildirir ki, insidentin ilkin səbəbi içməli suyun çirklənməsi ilə əlaqələndirilir. Hazırda Rusiya İstehlakçı Hüquqlarının Müdafiəsi və İnsan Rifahına Nəzarət Xidməti (Rospotrebnadzor) hadisənin başvermə səbəbini araşdırmaq üçün bölgədə su nümunələri götürür və təhlillər aparır.
Zəhərlənən şəxslərdə əsas simptomlar ürəkbulanma, qusma, qarın ağrısı və yüksək temperatur olub. Təcili tibbi yardım qrupları və həkim briqadaları hadisənin miqyasına görə əraziyə cəlb edilib. Hələlik zəhərlənməyə konkret hansı bakteriyanın və ya maddənin səbəb olduğu açıqlanmayıb.
Yerində aparılan araşdırmalar davam edir və ehtimal olunur ki, suyun təmizlənməsi və nəzarət sistemində nasazlıq baş verib. Maqaramkent rayon administrasiyası sakinləri müvəqqəti olaraq qaynadılmamış su içməməyə çağırıb.
Hüquq-mühafizə orqanları və sanitar xidmətlər hadisə ilə bağlı əlavə təhlükəsizlik tədbirləri görür. Eyni zamanda, gələcəkdə bu cür hallarının qarşısının alınması üçün regional su təchizatı sisteminin yenilənməsi məsələsi də gündəmə gətirilib.
