Türkiyənin Hatay vilayətinin Kırıkhan rayonunda silahlı soyğun hadisəsi baş verib. Üzü bağlı və silahlı iki nəfər qısa zaman ərzində zərgərlik mağazasından xeyli miqdarda qızıl götürərək hadisə yerindən qaçıb. Hadisə mağazanın təhlükəsizlik kameraları tərəfindən qeydə alınıb.
Məlumata görə, olay Kırıkhan rayonunun Yenimahalle ərazisində yerləşən, Suriya vətəndaşı Zaher Alshabb-a məxsus zərgərlik mağazasında baş verib. Kask geyinmiş iki şübhəli şəxs əllərində tapança və pompalı tüfənglə mağazaya daxil olaraq orada olan dörd nəfəri silah gücü ilə masanın arxasına keçməyə məcbur edib. Daha sonra vitrindəki qızıl məmulatlarını əvvəlcədən gətirdikləri torbaya dolduran soyğunçular cəmi üç dəqiqə ərzində mağazanı tərk ediblər.
Təhlükəsizlik kamerası görüntülərində şübhəlilərin mağazaya silahlı şəkildə daxil olduqları, qızılları sürətlə topladıqları və panika yaratdıqları açıq şəkildə görünür. Hadisədən sonra aparılan ilkin araşdırma zamanı təxminən 3 kiloqram qızılın oğurlandığı müəyyən edilib.
Mağaza sahibinin polisə müraciətindən sonra hüquq-mühafizə orqanları hadisə ilə bağlı genişmiqyaslı axtarış əməliyyatına başlayıb. Şübhəlilərin kimliyinin müəyyən edilməsi və saxlanılması istiqamətində işlərin davam etdiyi bildirilib. Hadisə bölgədə ciddi narahatlıq yaradıb və təhlükəsizlik tədbirlərinin gücləndirilməsi gündəmə gəlib.
