Yaponiya və Avropa İttifaqı bu gün Tokioda keçirilən sammitdən sonra rəqəmsal tərəfdaşlığın başlanmasına dair birgə bəyannamə qəbul ediblər.
TASS xəbər verir ki, bunu Avropa Komissiyasının (AK) rəhbəri Ursula fon der Leyen Yaponiyanın baş naziri Fumio Kişida və Avropa İttifaqı Şurasının prezidenti Şarl Mişel ilə birgə mətbuat konfransında deyib.
“Bu sammitdə biz bir sıra mühüm addımlar atdıq. İlk növbədə, Aİ və Yaponiya rəqəmsal tərəfdaşlığa başlayır”, – deyə o qeyd edib.
Bu, Aİ-nin dünyanın istənilən ölkəsi ilə ilk belə tərəfdaşlığıdır. AK rəhbərinin fikrincə, saziş bu sahədə əməkdaşlıq potensialını üzə çıxarmalı və firavanlığa və davamlı inkişafa gətirib çıxaracaq rəqəmsallaşmaya uğurlu keçidin təmin edilməsinə kömək etməlidir.
Mişel və fon der Leyen müntəzəm sammitdə iştirak etmək üçün Yaponiyaya səfər ediblər.
Avropa İttifaqı Şurasının rəhbəri mayın 13-də Xirosimaya da səfər edəcək.
