Rusiya prezidenti Vladimir Putin İtaliya prezidenti Sercio Mattarellaya ölkənin keçmiş baş naziri, “İrəli İtaliya” partiyasının qurucusu Silvio Berluskoninin vəfatı ilə bağlı başsağlığı verib.
Kremlin saytında dərc olunan teleqramında Rusiya prezidenti Berluskonini “əziz insan və əsl dost” adlandırıb.
Teleqramda Putin Berluskonini dünya səhnəsində yüksək nüfuza malik insan, İtaliya siyasətinin patriarxı kimi qiymətləndirib. O qeyd edib ki, ölkənin ən yaxın tarixində ən mühüm hadisələr İtaliyanın keçmiş baş nazirinin adı ilə bağlıdır.
Putin həmçinin Berluskoninin Rusiya-İtaliya tərəfdaşlığının inkişafına əvəzsiz töhfə verdiyini və onun Rusiyada iki dövlət arasında dostluq münasibətlərinin möhkəmləndirilməsinin ardıcıl və prinsipial tərəfdarı kimi xatırlanacağını qeyd edib.
Rusiya lideri əlavə edib ki, Berluskoninin müdrikliyinə, eləcə də çox çətin situasiyalarda balanslı və uzaqgörən qərarlar qəbul etmək bacarığına həmişə heyran olub.
Azpost.info
