Mançester Siti
“Mançester Siti” “Çelsi” ilə üz- üzə gəlib
Görüşdə hesabı qonaqlar açsa da, bunun davamını gətirə bilməyiblər.
İngiltərə Premyer Liqasının XXIII turunun oyunları davam edir.
Apasport.az xəbər verir ki, gecənin son görüşündə “Mançester Siti” “Çelsi” ilə üz- üzə gəlib.
Görüşdə hesabı qonaqlar açsa da, bunun davamını gətirə bilməyiblər.
“Şəhərəlilər” rəqibini 3:1 hesabı ilə məğlub etməyi bacarıb.
İngiltərə Premyer Liqası
XXIII tur
21.30. “Mançester Siti” – “Çelsi” – 3:1
Qollar: Madueke, 3, Gvardiol, 42, Haaland, 68, Foden, 87
Xatırladaq ki, İngiltərə Premyer Liqasının 23-cü turunda “Liverpul” evdə çempionatın autsayderi “İpsviç”i qəbul edib.
“Enfild”də baş tutmuş oyunu baş hakim Maykl Solsberi idarə edib.
Matçda hesab erkən açılıb: 11-ci dəqiqədə “qırmızılar”ın macarıstanlı yarımmüdafiəçi Dominik Soboslai dəqiq zərbə endirərək qapıçı Kristian Voltonu məyus edib. 35-ci dəqiqə misirli Məhəmməd Salah komandasının ikinci, özünün isə mövsümdə 19-cu qolunu qeydə aldırıb. Birinci hissəyə isə niderlandlı hücumçu Kodi Qakponun qolu ilə yekun vurulub – 3:0.
İkinci hissə də Arne Slotun yetirmələrinin hücumları ilə başlayıb. Bunun nəticəsidir ki, 66-cı dəqiqədə Kodi Qakpo dubla imza ataraq hesabdakı fərqi artırıb. “Traktorçular”ın isə gücü cəmi bir qola çatıb: 90-cı dəqiqədə Ceykob Qrivz başla topu qapıya göndərib – 4:1.
Turun digər qarşılaşmalarında isə “Arsenal” səfərdə “Vulverhempton”dan üstün olub – 0:1, “Sauthempton” – “Nyukasl” matçında “müqəddəslər”in növbəti məğlubiyyəti qeydə alınıb – 1:3, “Brayton” evdə “Everton”a yenilib – 0:1, “Bornmut” isə bu mövsüm fövqəluğurlu çıxışları ilə seçilən “Nottingem Forest”i darmadağın edib – 5:0.
Turun mərkəzi qarşılaşması Mançesterdə baş tutacaq: “Mançester Siti” “Çelsi”ni sınağa çəkəcək.
Qeyd edək ki, turnirin cədvəlinə 53 xala malik “Liverpul” liderlik edir. “Qırmızılar”ın ən yaxın təqibçisi isə 47 xalı olan “topçular”dır, lakin “Liverpul”un ehtiyatında bir oyun var. İlk üçlüyü “meşəçilər” (44 xal) qapayır.
