“Son vaxtlar Azərbaycanla Pakistan arasında əlaqələr daha da inkişaf edir. 44 günlük müharibədə, eyni zamanda, ondan sonra Pakistanın Azərbaycana siyasi dəstək verməsi və bu dəstəyin az qala Türkiyə ilə bərabər həddə çatması Azərbaycan tərəfindən Pakistana qarşı iqtisadi yumşalmalar, açılımlara gətirib çıxardı”.
Bunu Qaynarinfo-ya açıqlamasında iqtisadçı ekspert Akif Nəsirli Pakistan məhsullarının Bakıda azlığının səbəblərini açıqlayarkən deyib.
O bildirib ki, bu gün Bakıda Pakistan mağazalarının sayı artmaqdadır. Akif Nəsirli 2010-2015-ci illərdə Pakistan mallarının kütləvi şəkildə Azərbaycana gətirildiyini xatırlatdı:
“Hətta pakistanlılar bu məhsulları satmaq üçün regionlara gedirdi. Bu məhsulların əksəriyyətini pakistanlılar özləri gətirib satırdı. Sonradan Azərbaycanda idxal rüsumları artdı, həmçinin gömrük rüsumları da bahalaşdı”.
Akif Nəsirli Pakistan məhsullarının bu gün də Azərbaycana idxal olunduğunu qeyd edib.
“Bu gün şəhərin müxtəlif yerlərində mağazalarda Pakistan malları satılır. Həmin məhsulları azərbaycanlı iş adamları gətirir”.
