Diaspor Könüllüləri İctimai Birliyi “Effektiv beynəlxalq təmsilçilikdə könüllülər” layihəsi uğurla başa çatdı.
Gənclər və İdman Nazirliyinin qrant müsabiqəsi çərçivəsində dəstəklənən bu təşəbbüs, gənclərin beynəlxalq təmsilçilik sahəsində bilik və bacarıqlarını inkişaf etdirmək məqsədini daşıyırdı.
Layihənin əsas məqsədi, Azərbaycanın beynəlxalq platformalarda peşəkar şəkildə təmsil olunmasına töhfə vermək və gənclərin diplomatik bacarıqlarını inkişaf etdirmək idi. Bu çərçivədə aşağıdakı tədbirlər həyata keçirildi.
“Uğurlu komanda işinin sirrləri” adlı təlim – İştirakçılara komanda işi, liderlik və effektiv əməkdaşlıq strategiyaları izah edildi.
“Vaxtı necə effektiv idarə etmək olar?” adlı təlim – Gənclərə vaxt idarəetməsi metodları, prioritetlərin düzgün təyin olunması və məhsuldarlıq artırma üsulları öyrədildi.
“Sözün Gücü: Effektiv Kommunikasiya Bacarıqları” adlı təlim – Danışıq sənəti, auditoriya ilə düzgün əlaqə qurmaq və diplomatik ünsiyyət bacarıqları barədə məlumat verildi.
Hər üç təlim haqqında təlimçi – mentor Leyla Rəhimova gənclərə geniş məlumat verib və təlimlər çərçivəsində qrup işləri, team buildinglər və keyslər əsasında məşğələlər icra ediblər.
“Öndə Gənclər” İctimai Birliyinin sədri Fərhad Abdulov ilə görüş – Gənclərə vətəndaş cəmiyyəti, ictimai fəaliyyət və liderlik mövzusunda dəyərli məsləhətlər verildi.
“AEGEE-Baki” təşkilatının sədri Cəsur Mədətzadə ilə görüş – Gənclərin beynəlxalq layihələrdə iştirak imkanları və şəbəkələşmə metodları müzakirə olundu.
“Report İnformasiya Agentliyində” infotur – İştirakçılar media sahəsində iş prinsipləri ilə tanış olaraq, jurnalistika və informasiya yayımı barədə praktik biliklər əldə etdilər.
Dünya Azərbaycanlıları Gənclər İctimai Birliyinin baş katibi Nazrin Süleymanova ilə görüş və bağlanış mərasimi – Gənclərin beynəlxalq arenada rolu, diaspor fəaliyyəti və gələcək layihələr üçün perspektivlər barədə müzakirələr aparıldı.
Layihənin nəticəsində 40 nəfər gənc beynəlxalq arenada ölkəmizi daha effektiv təmsil etmək üçün zəruri biliklərə yiyələndi. İştirakçılar təcrübəli ekspertlərdən öyrənərək, real praktiki bacarıqlar əldə etdilər. Eyni zamanda, layihə çərçivəsində keçirilən görüşlər gənclərin şəbəkələşməsinə və beynəlxalq əlaqələr qurmasına şərait yaratdı.
Layihənin uğurla həyata keçirilməsində media və ictimaiyyətlə əlaqələr də mühüm rol oynadı. Tədbirlər sosial mediada geniş işıqlandırıldı, mətbuat vasitəsilə layihənin əhəmiyyəti vurğulandı.
