Bir çox evdə istifadə müddəti bitmiş dərmanlara rast gəlmək mümkündür. Bəs bu dərmanları təsadüfən qəbul etmək insan sağlamlığına necə təsir edir?
Təsəvvür edin ki, səhər yuxudan soyuqdəymə əlamətləri ilə oyanırsınız və yuxulu vəziyyətdə dərmanın istifadə müddətini yoxlamadan onu qəbul edirsiniz. Daha sonra həmin dərmanın istifadə müddətinin keçdiyini anlayırsınız. Bəs belə olan halda nə baş verə bilər?
Qaynarinfo xəbər verir ki, ABŞ Qida və Dərman Administrasiyası (FDA) bu mövzuda sadə tövsiyə verib: “Əgər dərmanınızın istifadə müddəti bitibsə, ondan istifadə etməyin”.
FDA bildirir ki, istifadə müddəti bitdikdən sonra dərmanın təhlükəsiz və effektiv olacağına heç bir zəmanət yoxdur. Lakin bu, təsadüfən istifadə müddəti keçmiş “parasetamol” qəbul etdiyiniz halda dərhal təşvişə düşməli olduğunuz anlamına gəlmir. Alimlərin fikrincə, istifadə müddəti bitdikdən sonra çox az sayda dərman toksik hala keçir. Dərmanların əksəriyyəti isə kimyəvi tərkibindəki dəyişikliklər səbəbindən zamanla təsir gücünü itirir.
Buna baxmayaraq, ehtimal aşağı olsa da, köhnə dərmanlardan istifadə böyük bir səhv sayılmalı və onların zəhərlənməyə səbəb ola biləcəyi unudulmamalıdır.
FDA xəbərdarlıq edir ki, bəzi istifadə müddəti keçmiş dərmanlar bakteriya yaranması riski daşıyır və təsiri azalmış antibiotiklər infeksiyaları müalicə edə bilməyərək daha ciddi xəstəliklərə və antibiotikə qarşı müqavimətə səbəb ola bilər. Antibiotikə qarşı müqavimət isə bakterial infeksiya zamanı dərmanların təsir etməməsi və infeksiyanın bədəni bürüyərək ölümə gətirib çıxarması deməkdir.
Bu cür risklərə ehtiyac yoxdur. Əgər dərmanın istifadə müddəti bitibsə, təlimat vərəqində qeyd olunan qaydalara uyğun şəkildə tullamalısınız. Dərmanları kanalizasiya sisteminə atmaq olmaz. Əgər təsadüfən istifadə müddəti bitmiş dərman qəbul etmisinizsə və hər hansı anormal hal müşahidə edirsinizsə, dərhal həkiminizə müraciət etməyiniz tövsiyə olunur.
