Sidney yaxınlığındakı Homebush Körfəzində yerləşən SS Ayrfield adlı gəmi, təbiətin insan əlindən uzaqlaşaraq necə möhtəşəm bir mənzərə yaratdığının canlı nümunəsidir. Bu gəmi, artıq “Üzən Meşə” (Floating Forest) kimi tanınır və təbiətin gücünü simvollaşdıran nadir təbiət möcüzələrindən biridir.
AzPost bildirir ki, 1911-ci ildə Birləşmiş Krallıqda “SS Corrimal” adı ilə inşa edilən bu gəmi, 1912-ci ildən Sidneydə fəaliyyətə başlayıb. II Dünya Müharibəsi zamanı Avstraliya hökuməti tərəfindən Sakit Okean bölgəsindəki ABŞ qoşunlarına təchizat daşınması üçün istifadə edilib. Müharibədən sonra, 1951-ci ildə “Ayrfield” adı ilə yenidən xidmətə başlamış və 1972-ci ilə qədər Newcastle ilə Blackwattle Bay arasındakı kömür daşımalarında istifadə olunub.
1972-ci ildə xidmət müddətini tamamlayan gəmi, Homebush Körfəzindəki gəmi qırıntıları sahəsinə göndərilib. Sahə, 2000 Sidney Olimpiya Oyunları öncəsi təmizlənərək Bicentennial Park və Sidney Olimpiya Parkına çevrilib.
Gəminin gövdəsi zamanla paslanıb və təbiət tərəfindən mənimsənilib. İllər ərzində gəminin gövdəsində mangrov ağacları böyüməyə başlayıb nəticədə gəmi tamamilə yaşıl bir meşəyə çevrilib. Bu təbii dəyişiklik, gəmini “Üzən Meşə” adlandırmağa səbəb olub.
Gəminin ətrafında SS Mortlake Bank, SS Heroic və HMAS Karangi kimi digər gəmi qalıqları da mövcuddur. Bu gəmi qalıqları, Homebush Körfəzinin sənaye və dənizçilik tarixini əks etdirir.
