Qəhvə
Qəhvə dünyada ən çox istehlak edilən içkilərdən biridir. AzPost.az bildirir ki, fərqli növ və hazırlanma üsulları qəhvənin sağlamlığa təsirində ciddi fərq yaradır. Mütəxəssislər hansı qəhvə növünün daha faydalı olduğunu açıqlayıb.
Ən təbii və sağlam qəhvə növü olaraq filtr qəhvə qəbul olunur. Bu içki antioksidantla zəngin olduğu üçün orqanizmdə sərbəst radikalları neytrallaşdırmağa kömək edir. Digər tərəfdən, espresso da yüksək kofein tərkibinə görə enerji verir, lakin çox istifadə olunması ürək döyüntüsünü sürətləndirə bilər.
Hazır qəhvələr isə əlavə maddələr və konservantlar ehtiva etdiyindən sağlamlıq üçün risklidir. Xüsusilə süni aromatizatorlar və çox şəkər əlavə olunan versiyalar piylənmə və diabet riskini artırır. Latte və kapuçino kimi süd tərkibli qəhvələrdə də kalori miqdarı yüksəkdir, bu isə arıqlamaq istəyənlər üçün əlverişli deyil.
Araşdırmalara görə, şəkərsiz və təbii qara qəhvə gündə bir-iki fincan olmaqla istifadə edildikdə ürək-damar sisteminə müsbət təsir edir. Eyni zamanda beyin funksiyalarını stimullaşdırır və yaddaşı gücləndirir. Mütəxəssislər bildirir ki, qəhvənin ən sağlam forması, təbii dənədən üyüdülən və heç bir qatqı əlavə olunmadan hazırlananıdır.
Bundan əlavə, orqanik qəhvə növləri pestisid və kimyəvi maddələrdən uzaq olduğu üçün sağlamlıq üçün daha uyğundur. Hər gün qəhvə içənlərə isə mütləq su balansını qorumaq və qəhvəni acqarına qəbul etməmək tövsiyə olunur.
