“Google” onlayn alış-veriş sahəsində növbəti addım ataraq geyimlərin virtual şəkildə sınanması funksiyasını test rejimində istifadəyə verib.
Trend “Techradar” nəşrinə istinadla xəbər verir ki, hələlik yalnız ABŞ-dakı istifadəçilər üçün “Google Search Labs” bölməsi vasitəsilə əlçatan olan bu texnologiya süni intellektdən istifadə edərək seçilmiş geyimdə insanın realistik görünüşünü yaradır.
Yeni funksiyadan istifadə etmək üçün “Search Labs” bölməsində onu aktivləşdirmək, tam boyuna fotoşəklini yükləmək, “Google Shopping” vasitəsilə geyimi seçmək və uyğun mallarda “Sına” düyməsinə basmaq lazımdır.
Bu xidmət üçün “Google” hesabı tələb olunur. Şəklin işlənməsi 10-15 saniyə çəkir. Bütün məlumatlar şifrlənmiş formada saxlanılır.
“Bu sehr deyil, kompüter texnologiyasına əsaslanan mürəkkəb alqoritmlərdir. Modelimiz bədən proporsiyaları, duruş və parça özəllikləri də daxil olmaqla 200-dən çox parametri təhlil edir”, – deyə layihənin texniki direktoru bildirib.
Hazırkı mərhələdə sistemdə yalnız üst geyimləri – gödəkcə, palto, don və ətəklər, həmçinin köynək və şalvarlar sınaqdan keçirilə bilər. Çimərlik geyimləri və kostyumlar funksiyada dəstəklənmir. Onlar yalnız müəyyən pərakəndə satıcıların malları üçün keçərlidir.
Funksiyanı sınaqdan keçirən istifadəçilər rəng və üslubun qiymətləndirilməsinin rahatlığını, həmçinin qırış və drapirovkanın realistik emalını qeyd ediblər. Buna baxmayaraq, sistemdə bədən proporsiyalarının ötürülməsində müəyyən qeyri-dəqiqliklər qalır. Xüsusilə Elvis Preslinin geyimləri kimi özəl obrazların sınanması imkanı maraq doğurub. “Bu, moda üçün zaman maşını kimidir”, – deyə Kaliforniyadan bir beta-tester bildirib.
Mütəxəssislər bu texnologiyanın üç əsas üstünlüyünü vurğulayırlar: məhsulun qaytarılmasının azalması (proqnozlara görə 25 faizə qədər), alışa çevrilmə faizinin artması və fərdiləşdirmə imkanlarının genişlənməsi. “Bu cür texnologiyalar elektron ticarətin qaydalarını dəyişəcək”, – deyə “RetailTech” analitiki hesab edir.
Funksiya daim təkmilləşdirilir. Yaxın gələcəkdə dəstəklənən geyim kateqoriyalarının artırılması və “Google”un mobil tətbiqi ilə inteqrasiyası planlaşdırılır. Məlumata görə, “Amazon” və “”Shopify” də oxşar texnologiyalar üzərində işləyir.
