Bu gün Türkiyə Böyük Millət Məclisində (TBMM) yeni sədr seçkiləri keçiriləcək. AzPost xəbər verir ki, bu, 28-ci qanunverici dönəmin ikinci dövrəsi üçün təşkil edilən səsvermədir və parlamentdə gərgin siyasi rəqabət müşahidə olunur.
Yarışda ümumilikdə beş deputat namizədliyini irəli sürüb. Ədalət və İnkişaf Partiyası (AK Parti) hazırkı sədr, İstanbul millət vəkili Numan Kurtulmuşu növbəti müddət üçün də namizəd göstərib. Cümhuriyyət Xalq Partiyası (CHP) Artvin millət vəkili Uğur Bayraktutanla, Xalqların Bərabərlik və Demokratiya Partiyası (DEM Partiya) Diyarbəkirdən Osman Cengiz Çandarla, İYİ Partiya isə İstanbuldan Mustafa Cihan Paçacı ilə təmsil olunur. Namizədlər sırasında Yeni Yol Partiyasının Samsun millət vəkili Mehmet Karaman da yer alıb.
Qeyd edək ki, seçkilər dörd mərhələdə keçirilə bilər. İlk iki turda namizədin qalib gəlməsi üçün üzvlərin üçdə ikisinin səsi tələb olunur. Əgər bu mümkün olmasa, üçüncü mərhələdə sadə çoxluq kifayət edəcək. Bu mərhələdə də qalib müəyyənləşməzsə, ən çox səs toplayan iki namizəd arasında sonuncu — dördüncü tur təşkil ediləcək. Sonda ən çox dəstək qazanan deputat TBMM sədri seçiləcək.
Qeyd edək ki, Türkiyə Böyük Millət Məclisinin tarixində bu günə qədər 30 nəfər sədr kürsüsündə əyləşib. İlk sədr və eyni zamanda ölkənin qurucusu olan Mustafa Kamal Atatürk olub. Məclisin tarixində ən uzun müddət sədr postunu Mustafa Abdülhalik Renda tutub. O, 1935-ci ildən 1946-cı ilə qədər fasiləsiz 11 il bu vəzifədə çalışıb.
Ən qısa müddət isə 2 ay 1 həftə sədr olmuş İsmət Sezginin adına yazılıb. Diqqətçəkən digər məqam isə İstanbulun indiyədək TBMM sədrliyinə ən çox nümayəndə çıxaran bölgə olmasıdır. Bu şəhərdən Ali Fethi Okyar, Kazım Karabekir, Ferruh Bozbeyli, İsmail Kahraman və hazırkı sədr Numan Kurtulmuş bu vəzifəyə seçilmişdir.
