Yer kürəsi
Yer üzündə oksigen bitəcək.
Yer kürəsinin gələcəyi ilə bağlı maraqlı və bir qədər də narahatedici elmi proqnoz açıqlanıb. AzPost xəbər verir ki, alimlər planetimizin atmosferində oksigenin tamamilə yox olacağı tarixi dəqiqləşdiriblər. Təxminlərə görə, bu proses təxminən 1 milyard ildən sonra başlayacaq və Yer biosferinin taleyini tamamilə dəyişəcək.
Mütəxəssislər bildirirlər ki, Yer hazırda oksigenin yüksək konsentrasiyası ilə zəngin biosfer mərhələsini yaşayır. Lakin tarixdə olduğu kimi, bu vəziyyət əbədi davam etməyəcək. Tədqiqatlar göstərir ki, təxminən 2,4 milyard il əvvəl baş verən Böyük Oksigen Hadisəsi kimi, gələcəkdə də Yer atmosferində ciddi dəyişiklik yaşanacaq. Alimlərin proqnozuna görə, bir müddətdən sonra oksigen səviyyəsi sürətlə azalaraq yerini metanla zəngin atmosferə verəcək.
Nature Geoscience jurnalında dərc olunan araşdırmada vurğulanır ki, bu proses mərhələli baş versə də, son dövrü olduqca sürətli olacaq. Günəş radiasiyasının artması nəticəsində karbon qazının parçalanması, fotosintez prosesini zəiflədəcək və oksigen istehsal edən orqanizmlər tədricən məhv olacaq.
Corciya Texnologiya İnstitutunun geofiziki Kris Reynhard bildirib ki, oksigen səviyyəsi indiki göstəricilərdən milyon dəfə aşağı düşəcək. Alimlərin hesablamalarına görə, Yerin atmosferindəki oksigen tamamilə tükənənə qədər okeanlar Günəş istiliyi ilə buxarlanacaq və planetdə anaerob canlılar üçün əlverişli mühit yaranacaq.
Bu elmi kəşf yalnız Yer kürəsinin gələcəyi üçün deyil, astrobiologiya üçün də xüsusi əhəmiyyət kəsb edir. Belə ki, müasir teleskoplar digər planetlərdə həyat axtarışında əsas göstərici kimi oksigenin izinə düşür. Lakin bu tədqiqat sübut edir ki, oksigen dövrü keçici ola bilər və buna görə də əlavə həyat əlamətləri, yəni bioimzalar axtarılmalıdır.
Alimlər hesab edir ki, mürəkkəb həyat formalarının mövcudluğu planetin ümumi ömrünün cəmi 20-30 faizini təşkil edəcək. Yerdə oksigenin tükənməsi ilə yanaşı, ozon təbəqəsi də sıradan çıxacaq və bu da həyatı tamamilə yeni mərhələyə sürükləyəcək.
