İran rəsmiləri vasitəçilərə bildiriblər ki, onlar ABŞ-la danışıqları bərpa etməyə hazırdırlar. Lakin ilk növbədə İsrailin hücumlarını dayandırmasını istəyirlər.
Bu haqda “Washington Post“ mənbələrə istinadən məlumat verib.
Nəşrin məlumatına görə, atəşkəs danışıqlarına başlamaq səylərinə Oman və Qətər rəhbərlik edib.
Wall Street Journal-ın məlumatına görə isə İran ərəb vasitəçiləri vasitəsilə ABŞ və İsrailə təcili mesajlar göndərərək, zərbə mübadiləsinin dərhal dayandırılmasında və nüvə danışıqlarının bərpasında maraqlı olduğunu bildirib. Nəşr bu barədə bir gün əvvəl, bazar ertəsi ABŞ və Avropadakı mənbələrə istinadən yazır.
Nəşrin məlumatına görə, Tehran ərəb diplomatlarına ABŞ-ın İsrailin hücumunda iştirakdan çəkinəcəyi təqdirdə danışıqlar masasına qayıtmağa hazır olduğunu bildirib. İranlılar həmçinin İsrailə mesajlar göndərərək, münaqişənin nəzarətdən çıxmasının qarşısını almaq üçün zərbələr mübadiləsində müəyyən məhdudiyyətlərin qoyulmasına çağırıblar.
Wall Street Journal-ın məlumatına görə, İran rəsmiləri ilə təmasda olan ərəb mənbələri Tehranın İsrailin uzun sürən yıxılma müharibəsinə tab gətirə bilməyəcəyinə ümid etdiyini və nəticədə diplomatik həll yolu axtarmağa məcbur olacağını bildirib. İranlılar əmindirlər ki, İsrailin münaqişədən dəqiq çıxış strategiyası yoxdur və ABŞ-ın aktiv köməyi olmadan Fordodakı yeraltı uranın zənginləşdirilməsi obyekti kimi hədəflərə ciddi ziyan vura bilməyəcək.
“İranlılar başa düşürlər ki, ABŞ İsrailə müdafiə və logistika baxımından dəstək verir”, – ərəb mənbəsi Amerika qəzetinə deyib. “Lakin onlar ABŞ-ın birbaşa hücumlara qoşulmayacağına dair aydın təminat istəyirlər”.
Eyni zamanda Tehran ərəb vasitəçilərinə xəbərdarlıq edib ki, ABŞ-la danışıqların bərpasının mümkünsüzlüyü aydınlaşarsa, İran nüvə proqramının inkişafını sürətləndirə və münaqişənin miqyasını genişləndirə bilər.
Ərəb diplomatları WSJ-yə bildiriblər ki, onlar hələlik İranın yeni güzəştlərə hazır olduğuna dair heç bir əlamət görməyiblər. Uranın zənginləşdirilməsi məsələsi əsas büdrəmə olaraq qalır: hər iki tərəf bunu “qırmızı xətt” kimi müəyyənləşdirib, ondan kənara çıxmaq niyyətində deyil.
