Capago
Bakı sakini Vüqar Mirzəğa oğlu Capago Azərbaycan viza mərkəzinin xidmətindən narazılıq edib. AzPost xəbər verir ki, vətəndaş bu barədə şəxsi sosial media hesabında paylaşım edərək, son illərdə mərkəzdə yaranan problemlərdən bəhs edib.
Onun sözlərinə görə, əvvəllər Capago-nun elektron sıra sistemi ödənişsiz idi və bu, növbə sıxlığına səbəb olurdu. Lakin sonradan 30 avro qarşılığında ödənişli sistem tətbiq olundu və vəziyyət qismən düzəldi. Vüqar bəy qeyd edib ki, bu addımı müsbət qarşılasa da, son dövrlərdə mərkəzin fəaliyyətində başqa narahatedici hallar müşahidə olunur.
Sosial şəbəkə istifadəçisi bildirib ki, sənədlərini tam və qaydalara uyğun hazırlasa da, sıra günü sənədlərində süni şəkildə “səhv” tapılır. Nəticədə vətəndaşa ya 100 manatlıq “platinum” xidmətindən istifadə etmək, ya da növbəti sıra üçün aylarla gözləmək təklif edilir.
Platinum xidməti çərçivəsində vətəndaşlara sənədlərin əvvəlcədən yoxlanılması, müraciət zamanı fərdi yanaşma və qeyri-iş günlərində qəbul imkanı təqdim edilir. Lakin Vüqar bəy bu xidmətin məcburi şəkildə təklif edilməsinin etik olmadığını vurğulayıb.
“Aviabilet alınıb, sənədlər hazırdır və son anda bu cür xəbər adamı çıxılmaz vəziyyətdə qoyur. Çox cüzi düzəliş üçün 100 manat tələb etmək düzgün yanaşma deyil,” — deyə o, paylaşımında qeyd edib.
Vətəndaş Capago rəhbərliyinə müraciət edərək, mərkəzin əvvəlki kimi şəffaf və vətəndaş yönümlü xidmət göstərməsini xahiş edib.
AzPost.az məsələ ilə bağlı Capago Azərbaycan viza mərkəzindən münasibət öyrənməyə çalışacaq.
