Beynəlxalq bank
Azərbaycan Beynəlxalq Bankının (ABB) müştərisi Alim Hüseynzadə bankı 249 dollarının mənimsənilməsində ittiham edir.
AzPost xəbər verir ki, şikayətçi iyulun onunda DigiTransfer vasitəsilə Türkiyədəki Enpara Bankındakı avro hesabına 249 dollar (təxminən 424 manat) köçürüb. Lakin üzərindən əlli gün keçsə də, vəsait qarşı tərəfə çatmayıb.
Onun sözlərinə görə, iyulun on birində ABB-yə müraciət edib və sorğu açılıb. Daha sonra banka dəfələrlə müraciət etsə də, hər dəfə fərqli və ziddiyyətli cavablar alıb. Bank əməkdaşları əvvəlcə əməliyyatın uğurlu olduğunu, daha sonra isə “pending” vəziyyətdə qaldığını bildiriblər.
Şikayətçi qeyd edir ki, Türkiyədəki bank əməliyyatın baş tutmadığını və qarşı tərəfdən təsdiqedici sənəd tələb etdiyini açıqlayıb. ABB-dən isə bu sənədi əldə etmək üçün müştəriyə filiallara müraciət etməsi tapşırılıb. Hüseynzadə avqustun on birində ABB-nin Gənclik filialına yaxınlaşıb və saatlarla növbə gözlədikdən sonra rəsmi sənəd tələb edib. Lakin əməkdaşlar bununla bağlı yenidən sorğu açılmalı olduğunu deyiblər.
Bundan sonra ABB operatorları müştəriyə bildirdilər ki, şikayət qeydə alınıb (CS-38605) və nəticənin on beş iş günü ərzində açıqlanacağı gözlənilir. Hüseynzadə isə əlavə gözləmə müddətindən narazıdır və bildirir ki, sadəcə təsdiqedici sənəd istəyib, lakin bank bunu təqdim etməyib.
“Əlli gündür pulumdan xəbər yoxdur. Mənim istəyim sadədir – ya vəsaitimi geri qaytarsınlar, ya da əməliyyatın uğurlu olduğunu sübut edən sənəd təqdim etsinlər”, – deyə şikayətçi vurğulayıb.
Bankın mövqeyini dərc etməyə hazırıq.
